Stała viadoma, čamu ŭ Azaryčach rabočy zarezaŭ žonku pravasłaŭnaha śviatara
2 kastryčnika minułaha hoda ŭ Azaryčach znajšli trup 42-hadovaj žančyny. Spačatku ŭ zabojstvie padazravali jaje muža, miascovaha śviatara, ale paźniej zatrymali inšaha padazravanaha — maładoha chłopca.
23-hadovy Viktar Marozaŭ — uradženiec susiedniaj vioski, pravodziŭ ramontnyja raboty ŭ pravasłaŭnym chramie, dzie słužyŭ ijerej Hieorhij Ahijevič.
«Paśla zakančeńnia pracoŭnaha dnia małady čałaviek stelefanavaŭsia sa svajoj dziaŭčynaj. Padčas razmovy pamiž imi adbyłasia svarka, paśla jakoj chłopiec vypiŭ ałkahol.
Padčas adnaho z dopytaŭ mužčyna rastłumačyŭ, što paśla svarki jon vyrašyŭ skraści mašynu śviatara, kab źjeździć da dziaŭčyny, — paviedamiŭ Śledčy kamitet.
— Uviečary małady čałaviek nakiravaŭsia da doma nastajaciela chrama. Dźviery adčyniła žonka śviatara, u jakoj jon staŭ patrabavać klučy ad aŭtamabila. Žančyna admoviła i pasprabavała začynić dźviery znutry. Abvinavačany udaryŭ jaje nažom i zajšoŭ u dom.
Paśla zabraŭ klučy ad aŭtamabila, skraŭ 20 dalaraŭ, 1000 rasijskich rubloŭ i mabilnik».
Na skradzienym mikraaŭtobusie Marozaŭ zajechaŭ na małočna-tavarnuju fiermu ŭ vioscy Viazovica i ździejśniŭ DTZ: najechaŭ na śmiećcievy kantejnier, ciuk sałomy i cysternu dla vady. Śviedkami stali rabotniki fiermy, jakija pryjšli na ranišniuju dojku karoŭ. Jany ž i zabrali ŭ pjanaha kiroŭcy klučy ad aŭtamabila. Paśla hetaha małady čałaviek źnik u nieviadomym nakirunku.
Viktara Marozava zatrymali praz dva dni. Jon pad vartaj, na jaho zaviali niekalki kryminalnych spraŭ: za zabojstva, ździejśnienaje z asablivaj žorstkaściu; za kradziež mašyny; za praniknieńnie ŭ žyllo i rabaŭnictva. Marozavu pahražaje rasstreł.
