Vardamacki śćviardžaje, što kolkaść prychilnikaŭ sajuzu z Rasijaj za hod abvaliłasia z 60% da 40%
Ciaham 2019 hoda kolkaść prychilnikaŭ sajuzu z Rasiejaj źniziłasia z 60,4 da 40,4 %. Takija vyniki sacyjałahičnaha daśledavańnia Biełaruskaj analityčnaj majsterni Andreja Vardamackaha pryvodzić «Biełsat».
Biełaruskaja analityčnaja majsternia pravodziła daśledavańnie ŭ śniežni 2019 hoda. Siarod apytanych — ludzi z roznych rehijonaŭ Biełarusi, pryčym nie tolki haradskoje, ale i sielskaje nasielnictva.
Sa źviestak Biełaruskaj analityčnaj majsterni vynikaje, što ciaham 2019 hoda ŭ biełaruskim hramadstvie adbyłasia źmiena hieapalityčnaj aryjentacyi. Adsotak prychilnikaŭ sajuzu z Rasiejaj źniziŭsia z 60,4 da 40,4 %. Takim čynam, kali zaŭtra adbudziecca refierendum nakont hieapalityčnaha vybaru Biełarusi, to prychilniki sajuzu z Rasiejaj nie zmohuć atrymać absalutnaj bolšaści hałasoŭ.
Ź vieraśnia da śniežnia 2019 hoda adbyvałasia abvalnaje padzieńnie prarasiejskich nastrojaŭ: kolkaść prychilnikaŭ sajuzu źniziłasia na 14,7 % za čatyry miesiacy (z 54,8 da 40,4 %). Adnačasova ŭzmacnilisia prajeŭrapiejskija nastroi ŭ hramadstvie: kolkaść prychilnikaŭ uvachodžańnia ŭ Jeŭrasajuz vyrasła z 24,4 da 32 %.
Mienavita ŭ pieryjad ź vieraśnia pa śniežań naziraŭsia pik intehracyjnych pieramovaŭ i źviazanych ź imi pratestaŭ. U vieraśni 2019 hoda ŭrady dźviuch krainaŭ uzhadnili prajekt prahramy dziejańniaŭ pa pahłybleńni intehracyi i śpis darožnych kart. Ciaham kastryčnika-listapada prachodzili ŭradavyja pieramovy nakont źmiestu kartaŭ, a ŭ śniežni čakałasia (ale tak i nie adbyłosia) padpisańnie hetych dakumientaŭ na ŭzroŭni kiraŭnikoŭ dziaržavaŭ. Ciaham śniežnia ŭ Minsku i inšych haradach Biełarusi adbyłasia sieryja akcyjaŭ u abaronu niezaležnaści i suprać intehracyi z RF.
Absalutnaja bolšaść biełarusaŭ — 74,6 % — pierakananyja, što Biełaruś i Rasieja musiać być całkam niezaležnymi dziaržavami, ale mieć siabroŭskija dačynieńni z adkrytaj miažoj, adsutnaściu vizaŭ i mytni. A voś 6,6 % apytanych ličać, što stasunki z Rasiejaj nie musiać adroźnivacca ad stasunkaŭ ź inšymi krainami, — to-bok pavinny isnavać zakrytaja miaža, mytnia i vizy.
Za abjadnańnie Biełarusi dy Rasiei ŭ sajuznuju dziaržavu vykazalisia 12,8 % respandentaŭ, a za ŭvachodžańnie ŭ skład RF — tolki 3,7 %.
Kiraŭnik Biełaruskaj analityčnaj majsterni Andrej Vardamacki ŭ intervju «Biełsatu» adznačyŭ, što źnižeńnie prarasiejskich nastrojaŭ ciaham 2019 hoda možna padzialić na dva etapy: pastupovy (sa studzienia da vieraśnia) i abvalny (ź vieraśnia da kanca śniežnia).
«Raniej takoha nie było nikoli, — padkreślivaje Vardamacki. — Pryčyna tektaničnaha abvału nosić miedyjny charaktar. Reč u tym, što źmianiłasia tanalnaść viaščańnia biełaruskich miedyjaŭ adnosna samoj Rasiei, a taksama adnosin Biełarusi dy Rasiei. Tanalnaść nabyła bolš niehatyŭny charaktar».
Na dumku Vardamackaha, hieapalityčnyja pohlady biełarusaŭ u 2020 hodzie praciahnuć farmavacca pad upłyvam situacyi ŭ biełaruska-rasiejskich stasunkach i tanalnaści miedyjaŭ pry aśviatleńni hetych dačynieńniaŭ.
«Pastupovy adkat nazad mahčymy, ale heta budzie dastatkova ciažka zrabić. Bo nazirajecca peŭnaje zaćviardzieńnie trendu na źnižeńnie prarasiejskich nastrojaŭ», — dadaŭ jon.
