Linkiavičus: Pryjšoŭ čas dla bolš intensiŭnych kantaktaŭ Biełarusi i Litvy
Fota Nadziei Bužan
Pra heta zajaviŭ ministr zamiežnych spraŭ Litvy Linas Linkiavičus na sustrečy z premjer-ministram Biełarusi Siarhiejem Rumasam, piša BiełtA.
«Nadyšoŭ čas dla bolš intensiŭnych adnosin, kantaktaŭ i adkrytaj razmovy, pakolki, niahledziačy na ŭsie stanoŭčyja prykłady (supracoŭnictva), jość i roznahałośsi. Ale hetyja roznahałośsi nie źjaŭlajucca pryčynaj nie razmaŭlać. My pavinny heta rabić», — skazaŭ Linas Linkiavičus.
Siarhiej Rumas źviarnuŭ uvahu na toje, što Biełaruś i Litva — krainy-susiedzi, i blizkaść rynkaŭ, histaryčnyja hłybokija kulturnyja, rodnasnyja kantakty stvarajuć tryvały padmurak, jaki dazvalaje budavać uzajemavyhadnaje biełaruska-litoŭskaje supracoŭnictva.
«Handlova-ekanamičnaje supracoŭnictva ź Litvoj siońnia raźvivajecca vielmi dobra. U 2019 hodzie naš tavaraabarot nabliziŭsia da paŭtara miljardaŭ dalaraŭ, i na praciahu apošnich piaci hadoŭ biełaruskija hruzy zabiaśpiečvajuć 30% zahruzki Kłajpiedskaha dziaržaŭnaha marskoha porta», — adznačyŭ kiraŭnik biełaruskaha ŭrada.
Aktyŭnuju ŭzajemnuju cikavaść paćviardžaje vizavaja statystyka. Tamu, na dumku Siarhieja Rumasa, dla ŭradaŭ dźviuch krain važnaj zadačaj stanovicca pavyšeńnie prapusknoj zdolnaści i sinchranizacyja pracy pahraničnych i mytnych słužbaŭ Biełarusi i Litvy.
U svaju čarhu ministr zamiežnych spraŭ Biełarusi Uładzimir Makiej zajaviŭ, Biełaruś hatovaja abmierkavać ź Litvoj ŭsie najaŭnyja prablemnyja pytańni i mahčymaści kampramisnych rašeńniaŭ na ŭzajemavyhadnaj asnovie.