«Pa kvateru źviartaŭsia kuratar z KDB»: eks-dyrektar UKB Centralnaha rajona Minska asudžana na piać hadoŭ kałonii
Sud Frunzienskaha rajona Minska pryhavaryŭ eks-dyrektara Upraŭleńnia kapitalnaha budaŭnictva Centralnaha rajona da piaci hadoŭ pazbaŭleńnia voli ŭ kałonii ahulnaha režymu. Jana abvinavačvałasia ŭ tym, što zaklučyła ź ludźmi, što mieli patrebu ŭ žylli, dahavory dolevaha budaŭnictva na kvatery ŭ domie na praśpiekcie Pieramožcaŭ u Lebiadzinym, nie daŭšy inšym ludziam roŭnaj mahčymaści daviedacca pra heta, piša Tut.by.
Ludmiła Kniazieva kiravała UKB Centralnaha rajona z 2014 pa 2018 hod, zrabiŭšy jaho z adstajučaha adnym z najlepšych dziaržaŭnych zabudoŭščykaŭ stalicy. A 23 listapada 2018 hoda jaje zatrymali pa padazreńni ŭ šerahu karupcyjnych złačynstvaŭ. Da pačatku śniežnia, kali pačaŭsia sud, Kniazieva była ŭ SIZA. Praces viała sudździa Julija Krepskaja. Bok abvinavačvańnia pradstaŭlaŭ prakuror Alaksandr Taŭstahuzaŭ.
Siońnia sud Frunzienskaha rajona pryznaŭ Ludmiłu Kniazievu vinavataj u pieravyšeńni ŭłady i słužbovych paŭnamoctvaŭ, učynienych ź inšaj asabistaj zacikaŭlenaściu, što paciahnuli ciažkija nastupstvy (č. 3 art. 426 KK). Pakarańnie — piać hadoŭ pazbaŭleńnia voli ŭ kałonii ahulnaha režymu (prakuror patrabavaŭ 6).
Jana taksama abvinavačvałasia pa č. 2 art. 426 KK (Pieravyšeńnie ŭłady i słužbovych paŭnamoctvaŭ) i pa č. 2 art. 424 KK (Złoŭžyvańnie ŭładaj ci słužbovymi paŭnamoctvami). Ale pa hetych artykułach sud Ludmiłu Kniazievu apraŭdaŭ za adsutnaściu składu złačynstva.
Za što Kniazievu pryznali vinavataj?
Kniazievaj stavili ŭ vinu toje, što jana ŭ 2015 hodzie zaklučyła ź ludźmi, što mieli patrebu ŭ žylli (u tym liku z rabotnikami UKB), siem damovaŭ dolevaha budaŭnictva na kvatery ŭ domie na praśpiekcie Pieramožcaŭ u Lebiadzinym, nie daŭšy inšym ludziam roŭnaj mahčymaści daviedacca pra heta. Pa viersii śledstva, śpiecyjalna dla hetaha źmieny ŭ prajektnuju dekłaracyju byli apublikavanyja ŭ haziecie «Presboł» (a nie «Źviazda» ci «Minski kurjer», jak heta čaściej za ŭsio byvaje), plus u adnoj dekłaracyi byŭ pakazany niapravilny telefon UKB, a ŭ druhoj telefona zusim nie było.
Pa słovach Kniazievaj, z prośbaj vydzielić kvatery dla majučych patrebu da ich vusna źviarnuŭsia ich kuratar z KDB («choć potym admoviŭsia ad hetych słoŭ»).
Jana kazała, što ŭ sutnaści prajektnaja dekłaracyja pavinna była być stvorana dla hetaha. Jana tłumačyła, što davała zadańnie zrabić dekłaracyju tak, kab nie było ažyjatažu, ale ŭsio było zakonna. Pra toje, što dekłaracyi dziaržzabudoŭščyk moža publikavać tolki ŭ dziaržaŭnych ŚMI, jana nie viedała.
Kniazieva kaža, što napiaredadni publikacyi dekłaracyi jana šmat razoŭ telefanavała kurataru z KDB, kab jany pryjšli i ŭziali hetyja kvatery, ale jon nie braŭ słuchaŭku. U vyniku ŭ pieršy dzień padačy zajaŭ na kvatery ich padali dva supracoŭniki UKB i adzin supracoŭnik kamiteta budaŭnictva i inviestycyj Minharvykankama.
Praź niejki čas KDB pieradaŭ u UKB list pra toje, što im treba 6 kvater, kazała Kniazieva. Što jašče kankretna tam było skazana, jana nie zmahła patłumačyć.
— Jany prynieśli nam hety list, i my vymušanyja byli admovicca. Ja tak i nie zrazumieła, što heta byŭ za list i što jany chacieli. Padstava takaja była ci što?
A nieŭzabavie UKB Centralnaha rajona apublikavaŭ u tym ža «Presbole» dekłaracyju na jašče 4 kvatery dla tych, chto maje patrebu. Umovy tyja ž - kab nie było ažyjatažu. Tolki na hety raz numary telefona pradpryjemstva ŭ publikacyi naohuł ŭkazana nie było. Kniazieva kaža, što nie nadavała hetamu značeńnia ŭ viek internetu.
Pavodle jaje słoŭ, hetyja 4 kvatery treba było pradać dla taho, kab raźličycca z padradčykami. U vyniku dahavory dolevaha budaŭnictva zaklučyli ŭ liku inšaha eks-padradčyk UKB, maci adnakłaśnika syna Kniazievaj, a taksama (pa viersii abvinavačvańnia) supracoŭnik UKB praz padstaŭnuju asobu. Pryčym dvoje ź ich padali zajavy da publikacyi dekłaracyi. Kniazieva kazała, što pra padstaŭnych asobaŭ ničoha nie viedała i što kamandy pryniać zajavy ad ludziej zahadzia jana nie davała.
— Supracoŭnik sama b nie pryniała zahadzia zajavy, navat kali b ja zahadała. Heta niejki inšy zboj, - kaža jana.
Heta ŭsio było kvalifikavana jak pieravyšeńnie ŭłady i słužbovych paŭnamoctvaŭ, što abiarnułasia škodaj dla pradpryjemstva ŭ 313,9 tysiačy rubloŭ. Škoda ŭziałasia adtul, što kvatery hetyja byli vyznačanyja jak žyllo dla majučych patrebu (heta značyć z maksimalnaj prybytkam zabudoŭščyka ŭ 5%), a nie jak kamiercyjnaje žyllo (dzie prybytak moža być i 40%). A značyć, pa viersii abvinavačvańnia, tut jość vypuščanaja vyhada dla UKB — jana ž faktyčna škoda. Pry hetym materyjalnych vyhod dla Kniazievaj tut nie było. Rabiła heta ŭsio Kniazieva, pa viersii abvinavačvańnia, kab umacavać svoj aŭtarytet siarod padnačalenych i stvaryć vobraz svajoj mahutnaści. Ludmiła Kniazieva vykazałasia i pa pytańni škody.
Niama takoha zakanadaŭstva, što niedaatrymany prybytak moža być uronam. Kali było pieršaje śledstva, pa jakoj sprava była zakrytaja, była 21 kvatera i 224 tysiačy škody, a kali spravu staŭ vieści KDB, to stała 8 kvater i 313 tysiač škody. Ja pytałasia ŭ śledčaha: čamu nie miljard, nie tryljon? - kazała jana. Vinu jana nie pryznała.
Pa jakich epizodach sud apraŭdaŭ Kniazievu?
Kniazievu abvinavačvali ŭ złoŭžyvańni ŭładaj, što vyjaviłasia, pa viersii śledstva, u prahule pracy. Dokazy — fiksacyja sihnału mabilnaha telefona ŭ rajonie doma, dačy pad Radaškovičami i ŭ inšych miescach Minska i Minskaj vobłaści.
Eks-dyrektar tłumačyła, što ŭ jaje byŭ nienarmavany pracoŭny hrafik i raźjazny charaktar pracy dla pošuku novych abjektaŭ i naviedvańnia novych abjektaŭ, a taksama naradaŭ. Jana kazała, što zvyčajna pryjazdžała na pracu da 7.30, a potym uvieś dzień mahła być u raźjezdach. Što ž tyčycca sihnału mabilnika kala doma i dačy, to kala doma jak minimum znachodzicca administracyja Pieršamajskaha rajona, dla jakoha budavaŭ UKB, a kala lecišča Kniazieva sprabavała znajści ŭčastak dla asvajeńnia pradpryjemstvam. Jana kazała, što była 24 hadziny ŭ sutki na telefonie i prymała pa 200-300 zvankoŭ u dzień. Vinu jana nie pryznała.
Pa-druhoje, pa viersii śledstva, złoŭžyvańnie słužbovymi paŭnamoctvami vyjaviłasia taksama ŭ tym, što dačka i ziać Kniazievaj pracavali ŭ UKB i pa 20-40 dzion u hodzie nie chadzili na pracu, ale hrošy za heta atrymlivali. Pry hetym zajavy za svoj košt na hetyja dni byli, skazana ŭ abvinavačvańni.
Jak tłumačyła eks-dyrektar, usie zajavy, jakija prynosilisia joj, zaŭsiody nakiroŭvalisia ŭ adździeł kadraŭ. A pracu jaje dački i ziacia kuryravali ich niepasrednyja načalniki, jakija byli adkaznymi i strohimi. Vinu jana nie pryznała.
Jaje taksama abvinavačvali ŭ tym, što jana vykarystoŭvała słužbovy transpart u asabistych metach, što było traktavana jak pieravyšeńnie ŭłady i słužbovych paŭnamoctvaŭ. Pa hetym epizodzie Kniazieva taksama apraŭdanaja.
***
Padčas suda taksama niekalki raz było ŭźniata balučaje dla UKB Centralnaha rajona pytańnie ažyjatažu na kvatery. Sprava ŭ tym, što z-za nizkich koštaŭ na žyllo pad budynkam zabudoŭščyka časta načavali ludzi, pierakuplali čarhu pa 3 tysiačy dalaraŭ, bilisia, na ich vyklikali AMAP i hetak dalej. Naturalna, heta vyklikała hramadski rezanans, a značyć, zabudoŭščyku dastavałasia ad uładaŭ usich uzroŭniaŭ. «I za heta mianie Kačanava (eks-kiraŭnik Administracyi prezidenta) pakarała», — skazała ŭ adnoj z replik Ludmiła Kniazieva.
