Kala Pałaca sportu ŭ Minsku chacieli pastavić vialikaje koła ahladu. Ale niešta pajšło nie tak FOTA
U 2018 hodzie ŭ Minharvykankamie źjaviłasia ideja pastavić na nabiarežnaj kala Pałaca sportu vialikaje koła ahladu vyšynioj 120 mietraŭ, što ŭ dva razy vyšej za koła ahladu ŭ parku Horkaha i ŭsiaho na 15 mietraŭ nižej za znakamitaje «Łondanskaje voka», piša Tut.by.
Da kanca minułaha hoda była hatovaja vizualizacyja prajekta, vykananaja adnoj ź biełaruskich kampanij i nazvanaja Minsk Ring — «Minskaje koła». Pa słovach znajomych z pracesam krynic, vizualizacyju ŭžo hatovyja byli pradstaŭlać Łukašenku, ale ŭ kancy listapada minułaha hoda Andreja Šorca źniali z pasady staršyni Minharvykankama.
Novy ž kiraŭnik Minska Anatol Sivak admoviŭsia ad idei ŭstanoŭki koła ahladu kala Pałaca sportu. Jaho padychod taki: kali i ŭstaloŭvać novaje koła ahladu, to tolki ŭ parku i tolki za košt inviestara. U hetaj idei jość svaje prychilniki i svaje praciŭniki.
U Minsk Ring pavinna było być 32 zakrytyja kandycyjanavanyja kabinki-kapsuły, u kožnuju ź jakich moža źmiaścicca da 25 čałaviek. Adzin abarot 120-mietrovaha koła pavinien byŭ doŭžycca kala 30 chvilin.
Pry hetym, kab brać na bort novych pasažyraŭ, koła nie abaviazkova było b spyniać. Chutkaść u 0,9 kiłamietra ŭ hadzinu dazvalała b pasažyram uvachodzić i vychodzić na ŭzroŭni ziamli.
Koła pavinna było ŭjaŭlać saboj siłuet busła, što pavinna było nadavać jamu dadatkovuju simvaličnaść.
U asnovie koła chacieli raźmiaścić jakuju-niebudź zabaŭlalnuju ŭstanovu abo restaran. U ciomny čas sutak na abjekcie mierkavałasia padśvietka.
