Kitajskija dyzajniery prapanavali zrabić u Notr-Damie lustrany dach i ruchomuju «kapsułu času» zamiest špila FOTA
Kitajski prajekt pieramoh u nieaficyjnym konkursie prajektaŭ pa adnaŭleńni sabora Paryžskaj Božaj Maci, paviedamili RIA Naviny sa spasyłkaj na arhanizataraŭ. Konkurs pad nazvaj Design Notre Dame byŭ arhanizavany niezaležnym amierykanskim vydavieckim domam GoArchitect. Jon nie źviazany z francuzskim uradam, katalickaj carkvoj ci saboram.
Pieramožcy atrymali ŭznaharodu ŭ pamiery tysiačy dalaraŭ.
Usiaho ŭ konkursie ŭdzielničali 226 dyzajnieraŭ, vyjhraŭ kitajski prajekt pad nazvaj ZEYU CAI & SIBEI LI. Pieramožca byŭ vyznačany adkrytym hałasavańniem.
Pa zadumcy kitajskich dyzajnieraŭ, hatyčny Notr-Dam budzie adnoŭleny z dapamohaj sučasnych materyjałaŭ. Tak, jany prapanujuć pabudavać lustrany dach, a zamiest zharełaha špila stvaryć «mahnietyčnuju levitacyjnuju ŭstanoŭku».
«Novy špil aznačaje pamiać, prysutnaść i nadzieju ludziej. Kapsuła času rytmična ruchajecca ŭvierch i ŭniz, dychaje i bjecca razam z horadam. Adlustravańnie ŭnutry viežy špila stvaraje kalejdaskop horada. Jarkaje škło afarboŭvaje śviatło, tady jak struktura adlustroŭvaje cień. Pryhažość i łohika akna-ružy Notr-Dama całkam interpretujecca ŭ dyzajnie», — havorycca ŭ apisańni prajekta, apublikavanym na sajcie konkursu.
Unutry kapsuły času naviedvalniki zmohuć ubačyć horad, što atačaje ich ułasnyja partrety, jak kałaž. «Tut ludzi ŭspaminajuć, ludzi spaviadajucca, ludzi molacca», - pišuć aŭtary prajektu.
Najbujniejšy ŭ historyi pažar u sabory Paryžskaj Božaj Maci adbyŭsia ŭviečary 15 krasavika. Abrynuŭsia špil sabora, połymiem była achoplenaja apornaja kanstrukcyja.
Prezident Francyi Emanuel Makron zajaviŭ pra namier adnavić Notr-Dam za piać hadoŭ. Svaju dapamohu ŭ restaŭracyi sabora i zbory srodkaŭ na heta prapanavali mižnarodnyja arhanizacyi i bujnyja kampanii.
