Recept francuzskich pirožnych, jakija imhnienna źniknuć z talerki
Mahu ščyra nazvać pirožnyja šu svaimi samymi lubimymi — tut i chrustki vierchni słoj, i miakkaje zavarnoje ciesta. Plus vy zmožacie dadać u šu luby vaš ulubiony krem: zavarny, tvarožny, viarškovy. Takija pirožnyja vielmi zručna padavać haściam, ale budźcie hatovyja, što jany adrazu źniknuć z talerki.
Z francuzskaj movy choux pierakładajecca jak «kapusta», i, što cikava, pirožnyja atrymali svaju nazvu nie ad kapusty, a ad stravy z bulbaj, jakaja formaj była padobnaja na maleńki kačan.
Spačatku zrobim chrustki słoj — krakielin.
Nam spatrebicca:
- 25 hr. cukru
- 25 hr. muki
- 20 hr. masła
- kropla farbavalniku (možna bieź jaho, tady krakielin budzie prosta biełym).
Dla krakielinu biarom vielmi chałodnaje masła — jaho treba narezać drobnymi kubikami. Muku i cukar źmiešvajem, dadajom masła i zamiešvajem ciesta. Naprykancy dadajom farbavalnik i pieramiešvajem tak, kab koler byŭ roŭny.
Raskatvajem ciesta pamiž dvuma listami pierhamientu, kab taŭščynia krakielinu była prykładna 1—2 mm. Kładziom ciesta ź pierhamientam u ladoŭniu.
Na zavarnoje ciesta:
- 125 hr. małaka
- 125 hr. vady
- 110 hr. masła
- 150 hr. muki
- 5 hr. soli
- 5 hr. cukru
- 4—5 jajek.
U satejnik nalivajem małako z vadoj, dadajom kavałački masła, cukar i sol. Stavim na ahoń i čakajem, pakul usio masła rastanie. Prybirajem satejnik z ahniu i dadajom muku. Dobra pieramiešvajem i znoŭ stavim na siaredni ahoń, na chvilinki dźvie. Uvieś čas pieramiešvajem masu: jana pavinna skačacca ŭ šar. Zdymajem z ahniu i zusim krychu dajom astyć.
4 jajki ŭźbivajem i dadajom patrochu da ciesta, kožny raz dobra pieramiešvajučy. Hladzim na kansistencyju: ciesta pavinna ściakać z łapatki stužkaj. Kali jano jašče davoli tuhoje, to dadajom piataje jajka, ale vielmi akuratna, ledźvie nie pa kroplach. Znajści jašče parady pa hatavańni zavarnoha ciesta možna tut.
Procivień zmazvajem alejem (ci vykarystoŭvajem antypryharny dyvanok). Hatovaje zavarnoje ciesta pierakładajem u kandytarski miašok. Adsadžvajem na pierhamient kružočki ciesta (dyjamietram prykładna 4—5 sm).
Krakielin dastajom ź ladoŭni, formačkaj vyrazajem kruhi i kładziom pavierch zavarnoha ciesta. Dyjamietr kružka krakielinu robim troški mienšym za dyjamietr zavarnoha ciesta.
Vypiakajem 15 chvilin pry 180—200 hradusach.
Na krem:
- 340 hr. krem-čyzu
- 114 hr. masła
- 100 hr. cukrovaj pudry
- 1 č.ł. vanilnaha ekstraktu
Dla taho, kab krem dobra źmiašaŭsia, nam spatrebicca vielmi chałodny krem-čyz i vielmi miakkaje masła (pakińcie jaho na niekalki hadzin pry pakajovaj tempieratury).
Źmiešvajem krem-čyz, masła, cukrovuju pudru i vanilny ekstrakt i ŭźbivajem miksieram na siaredniaj chutkaści chvilin 5 — krem pavinien trymać formu.
Zapaŭniajem kremam kandytarski miašok z daŭhoj nasadkaj dla ekleraŭ i načyniajem pirožnyja, robiačy dziračku ci źnizu, ci zboku. Jašče možna zrezać vierch pirožnaha i načynić jaho.
Smačna jeści!
