Chto taki Uładzimir Bazanaŭ, jaki zamienić Rumasa ŭ Fiederacyi futboła?
«Naša Niva» sabrała piać faktaŭ pra vajskoŭca, jaki budzie kiravać biełaruskim futbołam.
Były futbalist zbornaj i trenier «Šachciora» Juryj Viarhiejčyk źniaŭ svaju kandydaturu z vybaraŭ na kiraŭnika Biełaruskaj fiederacyi futboła. Adzinym kandydatam zastaŭsia deputat Pałaty pradstaŭnikoŭ i były brescki vajenkam Uładzimir Bazanaŭ. Samym załajkanym kamientam na spartovym sajcie by.tribuna.com byŭ nastupny: «Ščyryja spačuvańni ŭsim, kamu jašče nie byŭ nieabyjakavy biełaruski futboł». Dyk chto ž taki hety mistar Bazanaŭ?
Naradziŭsia i vučyŭsia ŭ Rasii
Uładzimiru Bazanavu 61 hod, jon rodam z Vałahodskaj vobłaści Rasii. Praŭda, jon usio ž maje biełaruskaje pachodžańnie: jahonaja mama rodam ź Viciebskaj vobłaści. I kali pamior jaje muž, tata novaha kiraŭnika BFF, to jana viarnułasia ŭ Biełaruś.
Školnikam pastupiŭ u Leninhradskaje vajskovaje suvoraŭskaje vučylišča. Potym — u Kałomienskaje vyšejšaje artyleryjskaje kamandnaje vučylišča. Z pahonami lejtenanta Bazanaŭ adpraviŭsia słužyć u hrupie savieckich vojskaŭ HDR. Dobra viadoma, što aby-kaho na takuju słužbu nie brali.
Prajšoŭ praz Afhanistan
Kali SSSR staŭ uvodzić svaje vojski ŭ Afhanistan, Bazanaŭ vyrašyŭ prajavić siabie. U materyjale haziety «Vo słavu Rodiny» adznačajecca, što Bazanaŭ pisaŭ čatyry raparty, kab jaho adpravili ŭ zonu bajavych dziejańniaŭ. U inšym ža intervju jon sam kaža, što hetyja raparty pisaŭ, bo «zrazumieŭ, što nadoŭha nie vybieracca z Samarkanda». U vyniku ŭ Afhanie Bazanaŭ prajšoŭ praz 28 sutyčak z dušmanami. Maje orden Čyrvonaj Zorki.
Paśla Afhanistana Bazanava nakiravali na słužbu ŭ Zabajkalskuju vajskovuju akruhu, dzie jon i prabyŭ da 1988-ha. U hety čas u žonki ŭziaŭ dziaŭčynu ź Biełarusi, kali pryjazdžaŭ u adpačynak. Naprykancy isnavańnia SSSR atrymaŭ jašče adno pryznačeńnie ŭ HDR, ale ŭ chutkim časie savieckija vojski z hetaj terytoryi stali vyvodzić.
Z 1993 hoda Bazanaŭ na słužbie Uzbrojenych siłaŭ Biełarusi. Byŭ kamandziram artyleryjskaha pałka, kamandavaŭ rakietnaj bryhadaj. Ad 1999 — vajskovy kamisar Bresckaj vobłaści.
Nie najlepšyja časy ŭ bresckim «Dynama»
Kali Bazanaŭ staŭ žyć u Breście, to staŭ pastajanna naviedvać hulni miascovaj kamandy. Praź niejki čas jaho zaprasili ŭvajści ŭ praŭleńnie FK «Dynama». A paśla taho, jak Alaksandra Šyško zabrali ŭ Minsk u jakaści namieśnika ministra transpartu i kamunikacyj, to mienavita Bazanavu prapanavali ŭznačalić kłub.
Heta byŭ daloka nie najlepšy čas u historyi «Dynama». Bresckaja kamanda zaŭziata zmahałasia za vyžyvańnie, kab nie vylecieć u pieršy dyvizijon. Kłub zmoh vyratavacca tolki ŭ apošnich hulniach siezona. Plus da ŭsiaho ŭ kamandy ŭźnikli surjoznyja finansavyja prablemy. Hulcam pieryjadyčna nie płacili zarobki, a da ŭsiaho jašče BFSA «Dynama» zapatrabavała hrošy za vykarystańnie brenda. Na niejki čas kamandu navat pierajmienavali ŭ «Brest».
Zaŭziatary bresckaha «Dynama» ŭzhadvajuć časy Bazanava daloka nie ź lepšaha boku.
Adpraŭlaŭ futbalistaŭ u armiju
Mała taho, što najlepšyja futbalisty kamandy sychodzili ŭ BATE i minskaje «Dynama», dyk niekatorych hulcoŭ Brest hublaŭ pa pryčynie taho, što jany nakiroŭvalisia słužyć u armiju. Naprykład, takoj doli nie paźbieh adzin z najlepšych krajnich abaroncaŭ čempijanatu Biełarusi Ihar Burko.
«Kožny mužčyna pavinien słužyć u vojsku. Pryjšoŭ čas Burko — značyć, para addać doŭh radzimie. Kali b Ihar nie adpraviŭsia słužyć, to heta z majho boku, jak byłoha vajskovaha kamisara, było nie pravilna. Ihar pabyvaje ŭ vojsku i zrazumieje, što lepš hulać, čym słužyć. Jon budzie jašče bolš prafiesijna stavicca da svajoj karjery», — tłumačyŭ staršynia «Dynama».
Pahražaŭ jon vojskam i paŭabaroncu Edharu Alachnoviču, pierad sychodam taho ŭ BATE. «Vučy statut», — parekamiendavaŭ Bazanaŭ futbalistu ŭ pryvatnaj razmovie. Dla razumieńnia, futbalisty niačasta iduć słužyć u vojska.
Deputat Pałaty pradstaŭnikoŭ
Abiraŭsia Uładzimir Bazanaŭ pa Bresckaj-Pahraničnaj vybarčaj akruzie №4. U supiernikach u jaho byli małaviadomyja kandydaty ad sacyjał-demakrataŭ i «Spraviadlivaha śvietu».
U Pałacie pradstaŭnikoŭ jon uvachodzić u kamisiju pa biaśpiecy i abaronie. U kancy minułaha hoda Bazanaŭ lataŭ pa parłamienckaj linii navat u Vašynhton na kanfierencyju pa pytańniach vyviedki i biaśpieki.
U Bazanava dvoje synoŭ. Starejšy pracuje ekanamistam na bresckim pradpryjemstvie «Hiefiest», małodšy — student. Samym ščaślivym dniom u svaim žyćcio jon nazvaŭ dzień viasiella. «Ja vielmi kachaju svaju žonku», — kaža jon.
