Tradycyjny kaladny kieks: recept tvarožnaha štolena
Cikava, što šmatlikija śviatočnyja tradycyi zaviazanyja mienavita na ježy: kolki i jakich straŭ pavinna być na stale, jakija inhredyjenty vykarystoŭvać. A što jašče cikaviej, dyk heta nazirać za śviatočnymi stałami ŭ roznych krainach. Siońnia my z vami zavitajem u Niamieččynu i pasprabujem pryhatavać tradycyjnuju vypiečku na Kalady, jakuju ŭžo šmat hod tam hatujuć.
Pieršyja zhadki pra hety desiert źjavilisia ŭ 14-m stahodździ, z taho času jon i papularny. U Drezdenie navat isnuje śviata ŭ jaho honar, kali ŭ horadzie arhanizujecca pracesija z hihanckim štolenam, kavałak jakoha potym možna kupić na śviatočnym kirmašy.
Varyjacyj štolena isnuje vialikaja kolkaść: marcypanavy, mindalny, makavy, ale siońnia my z vami spynimsia na varyjancie z tvarahom. Smačna jeści!
Nam spatrebicca:
- 250 hr. masła dla ciesta;
- 250 hr. cukru;
- 250 hr. miakkaha tvarahu;
- 2 jajki;
- cedra 1 apielsina;
- 600 hr. muki;
- 2 č. ł. razrychlalnika;
- 200 hr. arechaŭ (naprykład, mindal, funduk i hreckija);
- 350 hr. suchafruktaŭ (razynki, suchija žuraviny, čarnaśliŭ, cukaty);
- 4 st. ł. romu;
- 100 hr. masła dla pramazvańnia;
- 100 hr. cukrovaj pudry.
Za niekalki dzion (ci chacia b za noč) rychtujem načyńnie: suchafrukty dobra myjem, režam na kavałački (kali jość bujnyja), zamočvajem u romie. Arechi rubim na siarednija kavałki.
Masła pakajovaj tempieratury ŭźbivajem z cukram da pyšnaj masy, dadajom jajki i dobra pieramiešvajem. Dadajom tvaroh i cedru, potym patrochu dadajom muku z razrychlalnikam, zamiešvajem hustoje ciesta.
Akuratna ŭmiešvajem u ciesta suchafrukty i arechi. Dzielim jaho na 2 častki i farmirujem z kožnaj pa štolenu. Tradycyjnaja forma robicca nastupnym čynam: ź ciesta robicca avał, adnu častku ciesta pryminajem rukami i nakryvajem hetaj tonkaj častkaj inšuju.
Duchoŭku hrejem da 180 hradusaŭ i vypiakajem štoleny na pierhamiencie prykładna 50-60 chvilin. Kali vierch budzie pačynać zanadta rana rumianicca, nakryjcie jaho falhoj.
Akramia hetaha, haračyja štoleny nasyčajem raspłaŭlenym masłam z dapamohaj pendźlika i abilna pasypajem cukrovaj pudraj.
Štoleny možna zaharnuć u falhu i pakinuć na tydzień u chałodnym miescy, kab jany jašče bolš nasycylisia duchmianym smakam.