Recept abrykosavaha piraha ź Linca, jaki ličać adnym z samych staražytnych u śviecie
U minuły raz my z vami daviedalisia pra niekatoryja sakrety piasočnaha ciesta. Ale, jak ja i zhadvała, varyjantaŭ ciesta i načyńniaŭ dla pirahoŭ moža być bieźlič. Tamu siońnia ja vyrašyła pakazać vielmi cikavuju varyjacyju piraha ź Linca, viadomaha jak Linzer Torte. Jaho asablivaść u vykarystańni arechavaj muki ŭ cieście i azdableńnie ŭ vyhladzie kratak.
Što cikava, lincki piroh ličycca najstarejšym pirahom u śviecie! Pieršy recept datujecca 1696 hodam, ale viadoma, što jon vyrablaŭsia i raniej. A nazvu svaju jon uziaŭ ad aŭstryjskaha horada Linc, dzie i raspačaŭsia masavy vyrab hetaj słodyčy.
Nižej vy znojdziecie varyjacyju hetaha recepta: z duchmianym abrykosavym džemam i varanymi žaŭtkami ŭ cieście: mienavita jany dadajuć asablivaju miakkaść ciestu. Smačna jeści!
Dla načyńnia:
- 300 hr. abrykosavaha džemu;
- cedra 1 apielsina;
Džem padahravajem, dadajom da jaho cedru. Heta robicca, kab cedra addała bolš svajho smaku.
Dla ciesta:
- 3 varanyja žaŭtki;
- 250 hr. masła pakajovaj tempieratury;
- 1/2 šklanki cukrovaj pudry;
- niekalki kropiel vanilnaj esencyi;
- 1/2 st.ł. romu;
- 1/2 šklanki funduku;
- 350 hr. muki;
- 1/4 č. ł. soli;
- 1/4 č. ł. razrychlalniku.
Varanyja žaŭtki treba pracierci praź sita. Masła ŭźbivajem z cukrovaj pudraj da biełaha koleru. Dadajom rom i vanil, pieramiešvajem. Arechi zusim trochi smažym na suchoj patelni i robim ź ich muku. Dadajom arechavaju muku da maślenaj masy razam z žaŭtkami. Zvyčajnuju muku prasiejvajem z razrychlalnikam i sollu i patrochu dadajom u ciesta. Miesim, kab atrymałasia hładkaje ciesta. Dzielim jaho na dźvie častki, abhortvajem falhoj ci cełafanam i pakidajem u ladoŭni na dźvie hadziny.
Dla hetaj kolkaści ciesta biarom formu dyjamietram 24 sm, zmazvajem formu masłam i trochu prysypajem mukoj.
Pieršuju častku ciesta raskačvajem na taŭščyniu 1 sm i vykładvajem na formu. Druhuju častku taksama raskačvajem, kab narezać na pałoski šyrynioj 3—4 sm.
Na ciesta vykładajem načynku i azdablajem pałosačkami ciesta.
Dla namazvańnia:
- 1 jajka;
- 2 st. ł. chałodnaj vady.
Jajka ŭźbivajem z vadoj i hetaj sumieśsiu zmazvajem piroh.
Stavim vypiakacca na 40—50 chvilin pry tempieratury 170 hradusaŭ.