Raźbirajemsia ŭ jajkach: čamu jany zialonyja i što značać litary na ich?
Na sielskahaspadarčych rynkach i roznych forumach prodažu sielskahaspadarčaj pradukcyi ŭsio čaściej pobač sa zvykłymi nam biełymi i rudymi jajkami možna ŭbačyć jajki zialonaha ci biruzovaha koleru.
Jany nie sapsavanyja! Akazvajecca, takija niezvyčajnyja zialona-błakitnyja jajki niasuć kurycy parody araŭkan.
Pra heta raskazaŭ pradaviec takich jajek Anatol.
«Pa svaim smaku jany ničym nie adroźnivajucca ad zvyčajnych jajek. A zvyčajnyja, heta jakija? Biełyja — ad biełych kuryc, rudyja — ad kalarovych. A jajki araŭkana nie tolki vyhladajuć ekzatyčna. Ličacca, što ŭ takich jajkach mienš chalesterynu. Dziasiatak ja pradaju pa rubli. Ale siońnia ŭsie 60 jajek kupiŭ adzin čałaviek. I jašče zamovy jość».
Anatol raskazvaje, što jajki zialena-błakitnaha koleru niasuć tolki kury araŭkany.
Tak vyhladajuć jajki ad kuryc parody araukan. Fota hanimalworld.com.ua
«Takija kury i sami vyhladajuć niezvyčajna. U ich kruhły azadak i niama chvasta. Tym, chto zajmajecca raźviadzieńniem kur, mahu śmieła raić araŭkanaŭ. Jany niasuć bolš bujnyja jajki, u adroźnieńni ad inšych parod. Navat u maładzieńkich kuryc jajki bujnyja. I na hod adna takaja kuryca niasie kala 150 jajek».
Araŭkan - kuryca biez chvasta i kruhłym azadkam. Fota fermeri.com.ua
Kali b zialonyja jajki pradavalisia ŭ kramach, jany b usie mieli markiroŭku 0 ci V.
A vy zadumvalisia nad tym, što akramia pamieraŭ, abaznačajuć litary na jajkach?
U hetym pytańni dapamahaŭ raźbiracca hałoŭny zaatechnik Minskaj ptuškafabryki № 1 Vital Vaskabovič:
«Usie jajki, jaki pastupajuć u prodaž, pramarkiravanyja. Na tych jajkach, jakija paznačanyja litaraj D, akramia ličby, jość jašče i data vyrabu.
Litara D abaznačaje, što jajka dyjetyčnaje, u im zachavanyja ŭsie vitaminy i mikraelemienty.
I jano pavinna być realizavana ciaham siami sutak paśla taho, jak źniesienaje. U prodaž takija jajki pastupajuć nie tak časta, u asnoŭnym ich zamaŭlać dla charčavańnia dziaciej, naprykład, u škołach».
Litara S — abaznačaje, što jajka stałovaje. Jano moža realizoŭvacca ciaham 25 sutak.
Katehoryjam i D, i S adpaviadajuć ličby: 3, 2, 1, 0 i V.
Ličba 3 abaznačaje, što jajka maje vahu 35 — 44,9 hrama, ličba 2 — vaha jajka ad 45 da 54,9 hrama, 1 — 55-64,9 hrama, 0 — 65-74,9 hrama.
«Jość jašče markiroŭka DV abo SV. Heta jajki vyšejšaj katehoryi. Vaha ŭ ich zvyčajna bolšaja za 75 hramaŭ».
Darečy, u kulinarnych receptach zvyčajna masa adnaho jajka ličycca roŭnaj 40 h, to bok majecca na ŭvazie nievialikaje jajka 3-j katehoryi.
Uličvajcie heta, kali budziecie piačy pirahi.