Małočnaja kampanija z suśvietnaha top-3 nabyła Lachavicki małočny zavod
«Lachavičok» vyrablaje masła, śmiatanu, małako i navat redkaje siońnia šakaładnaje masła biez raślinnych tłuščoŭ. Fota «Lachavicki vieśnik».
Bielhijskaja B.S.A. International S.A. nabyła kantrolny pakiet akcyj SAAT «Lachavicki małočny zavod». Heta ahienctvu «Biznes-naviny» paćvierdzili dźvie niezaležnyja adna ad adnoj krynicy. U kancy studzienia B.S.A. International raźmiaściła paviedamleńnie ab skupcy akcyj.
Pavodle infarmacyi Biełaruskaj valutna-fondavaj biržy, u vyniku vaśmi ździełak, praviedzienych u forvardnym režymie, pradali 69,3% akcyj Lachavickaha małočnaha zavoda. Suma ŭhodaŭ skłała BYN 18,2 młn (USD 9,4 młn). Jašče adna ździełka była ździejśnienaja ŭ biełaruskich rublach u režymie bieśpierapynnaha padvojnaha aŭkcyjonu na sumu BYN 4,1 młn.
Akcyi kuplalisia pa USD 52,87 pry naminalnym košcie BYN 17.
U abjavie ab skupcy akcyj adznačałasia, što B.S.A. International hatovaja skupić 100% statutnaha fondu. Jakaja dola akcyj užo naležała bielhijskaj kampanii da momantu ździajśnieńnia ździełak, nieviadoma.
U jurydyčnaj kampanii «Arcynhier i partniory», jakaja pradstaŭlała intaresy bielhijcaŭ ŭ pahadnieńni, admovilisia jaho kamientavać, spasłaŭšysia na pryvatnaść. Dyrektar SAAT «Lachavicki małočny zavod» Viačasłaŭ Žukoŭski paćvierdziŭ, što ŭ kampanii źmianiŭsia asnoŭny ŭłaśnik, adnak havaryć ab dalejšych płanach raźvićcia pradpryjemstva admoviŭsia.
Pavodle infarmacyi Bloomberg, B.S.A. International źjaŭlajecca maciarynskaj kampanijaj adnaho z najbujniejšych vytvorcaŭ małaka — francuzskaj Groupe Lactalis S.A. Kampanija naležyć siamiejnaj dynastyi Biesńje (Besnier). Pa dadzienych IFCN (International Farm Comparison Network), Groupe Lactalis źjaŭlajecca trecim pa vieličyni pierapracoŭščykam małaka ŭ śviecie paśla amierykanskaj Dairy Farmers of America i novaziełandskaj Fonterra. Dla paraŭnańnia, šviejcarskaja hrupa Nestlé zaniała ŭ rejtynhu 5-je miesca, francuzskaja hrupa Danone — 11-je miesca.
Groupe Lactalis vałodaje takimi brendami, jak President, Galbani, Lactel, Bridel i inšymi. Daččynyja kampanii hrupy pradstaŭleny pa ŭsim śviecie.
SAAT «Lachavicki małočny zavod» źjaŭlajecca adnym ź nievialikich małakapierapracoŭčych pradpryjemstvaŭ Biełarusi. Pa vynikach I paŭhodździa 2016 hoda vyručka kampanii skłała BYN 19,1 młn. Pry hetym kampanija ŭvachodzić u 20-ku samych prybytkovych kampanij haliny. Jaje čysty prybytak u studzieni-červieni 2016 hoda skłaŭ BYN 1 987,7 tys. Pradukcyja kampanii pradajecca pad brendam «Lachavičok».
