Mahiloŭski psichaterapieŭt: «Chełoŭin robić vas chałujami Zachadu i djabła»
Hazieta «Viečiernij Mohilov» siońnia ŭzarvała biełaruski internet, nadrukavaŭšy 10 pryčyn, čamu treba pahardžać Chełoŭinam pa viersii Mikałaja Łajšy — psichaterapieŭta Mahiloŭskaj abłasnoj psichijatryčnaj balnicy.
Što doktar maje suprać dnia, u jakim moładź bačyć prosta čarhovuju nahodu patusavacca?
Pryvodzim skaročanyja dovady psichaterapieŭta.
1) «Śviata nosić relihijny pahanski antychryścijanski charaktar, udzieł u im chryścijan niedapuščalny», — miarkuje doktar.
2) «Nazva Chełoŭina jak Dnia ŭsich śviatych nie adpaviadaje sutnaści śviata, — piša jon. — Katalickaje śviata ŭsich śviatych źmiašałasia z pahanskim i padaryła jamu svaju nazvu. Padobnymi rudymientami pahanstva ŭ našaj krainie źjaŭlajucca h.zv. kaladki na Kalady i Kupalle ŭ dzień Śviatoha praroka Pradciečy i Chryściciela Haspodniaha Iaana».
3) «Nadziavać harbuz zamiest hałavy — pryvilej ludziej biez hałavy».
4) «Udzieł u Dni ŭsich Śviatych viadzie da demaralizacyi śviadomaści, asabliva ŭ dziaciej i padletkaŭ», — miarkuje Łajša i dadaje, što pry śviatkavańni nibyta adbyvajecca padmiena i pierakručvańnie čałaviečych ujaŭleńniaŭ pra dabro i zło, pryhažość i biazładździe, praŭdu i chłuśniu.
5) «Dzień usich Śviatych robić jaho ŭdzielnikaŭ chałujami Zachadu i djabła, — śćviardžaje doktar. — Ažyćciaŭlajecca naviazvańnie anhłamoŭnaj psieŭdakultury i ładu žyćcia, ahresiŭnaja ekspansija sumnieŭnych «zabaŭ», restaŭracyja staražytnych kultaŭ słužeńnia siłam zła pad vyhladam «djabalskaha karnavała».
6) «Psichičnyja rasstrojstvy i apantanaść. Dziciačyja strachi, nieŭrozy, psichičnyja parušeńni, niematyvavanaja ahresija, načnyja kašmary, «hałasy», apantanaść biesami — voś «pabočnyja efiekty» Chełoŭina», — piša doktar i śćviardžaje, što psichična i duchoŭna zdarovy čałaviek nie budzie pieraapranacca ŭ niečyść.
7) «Udzieł u Dni ŭsich Śviatych viadzie da ŭchvaleńnia kultu śmierci zamiest kultu žyćcia», — doktar vystupaje suprać źniaćcia tabu na ahidu ad «kostak», «čerapaŭ», «trun», i «prykolnych cukierak z ekskremientaŭ».
8) «Ukaranieńnie ŭ śviadomaść dziaciej i moładzi temy śmierci spryjaje rostu samahubstvaŭ. Nastojlivaje ŭkaranieńnie ŭ śviadomaść dziaciej i moładzi temy śmierci, pamirańnia, nikčemnaści žyćcia pryviało da taho, što Rasija, jakaja ŭ pačatku XX stahodździa była na apošnim miescy ŭ śviecie pa kolkaści samahubstvaŭ, i pierš za ŭsio dziciačych, ciapier akazałasia na vierchnich prystupkach hetaj strašnaj statystyki. Pry hetym dziciačyja suicydy ŭsio čaściej nabyvajuć hrupavy charaktar, i nižniaja ich miaža — uzrost 5-6 hadoŭ!» — piša mahiloŭski psichaterapieŭt i padkreślivaje, što rasijskaja statystyka charakternaja i dla Biełarusi.
9) «Chełoŭin — prybytkovy biznes, što niščyć kašalki baćkoŭ», — u abaronu hetaha tezisu doktar piša, što chacia ličby vydatkaŭ na śviatkavańnie Chełoŭina ŭ Biełarusi nieviadomyja, u ZŠA jany składajuć da $2,5 młrd.
10) «Pravasłaŭnaja Carkva i inšyja kanfiesii rajać admovicca ad udziełu ŭ śviatach typu Chełoŭin», — padsumoŭvaje Mikałaj Łajša.
Moładź hulaje na Chełoŭin u Minsku
Pakul što internet reahuje na publikacyju kamientarami ŭ duchu «jak časta psichaterapieŭtu davodziłasia sustrakacca na pryjomach z apantanymi biesami?» i «što ž ciapier rabić z «maščami» pravasłaŭnych śviatych, jakija taksama nie vielmi žyvyja».
