Były palitviazień Alaksandr Małčanaŭ słužyć va ŭkrainskim vojsku: Praź miesiac budu na froncie z zarobkam $420
Dobraachvotnik Alaksandr Małčanaŭ, jaki dałučyŭsia da Uzbrojenych siłaŭ Ukrainy, raspavioŭ Belsat.eu, jak jamu słužycca.
Alaksandr Małčanaŭ u «vučebcy»
Biełarus Alaksandr Małčanaŭ, jaki ŭ svoj čas byŭ viaźniem Płoščy-2010, va Ukrainu pryjechaŭ u 2014 hodzie. Tam jon dałučyŭsia da adnaho z dobraachvotnickich bataljonaŭ, jaki zmahaŭsia ź sieparatystami na ŭschodzie krainy. Aficyjna słužyć va ŭkrainskim vojsku na toj momant zamiežniki nie mahli: takaja mahčymaść źjaviłasia tolki sioleta ŭ pačatku červienia, kali prezident Ukrainy Piatro Parašenka padpisaŭ adpaviedny ŭkaz.
Belsat.eu: U «Facebook'u» vy napisali, što ciapier užo aficyjna papoŭnili šerahi ŭkrainskaha vojska. Jak vam słužycca?
Alaksandr Małčanaŭ: Nu pakul ja ŭ «vučebcy». U pryncypie, usio narmalna, pakul asabliva čahości składanaha niama. Miesca «vučebki» nazyvać nie budu, dumaju, pakul nie varta hetaha ahučvać.
Belsat.eu: A na jakich umovach vy, biełarus, słužycie va ŭkrainskim vojsku?
Alaksandr Małčanaŭ: Zaraz jość pałažeńnie, jakoje dazvalaje zamiežnikam słužyć u vojsku na pasadach šarahovaha składu, siaržanckaha dy staršynskaha. Aficery dy praparščyki pakul nie majuć prava słužyć, kali nie majuć ukrainskaha hramadzianstva. Ja šarahovy.
Belsat.eu: Alaksandr, jak vam apłačvajuć słužbu — hetak sama, jak i ŭkraincam?
Alaksandr Małčanaŭ: Dakładna hetak ža, jak i ŭkraincam, na tych ža samych umovach.
Ciapier u «vučebcy» atrymaju kala 6 tys. hryŭniaŭ (kala $ 230) za miesiac. Paśla zakančeńnia «vučebki» — kala 7 tys. hryŭniaŭ (kala $ 270). Kali ž budu ŭ zonie bajavych dziejańniaŭ (ja nakirujusia tudy niedzie praź miesiac), razam z dapłatami maje być kala 11 tys. hryŭniaŭ (kala $ 420).
Belsat.eu: Čamu vy ŭsio ž vyrašyli pajści va ŭkrainskaje vojska? Nie było inšych varyjantaŭ, kab lehalizavacca va Ukrainie, albo adčuvajecie, što vajskovaja sprava — dla vas?
Alaksandr Małčanaŭ: Raniej, u pryncypie, vajskovaja sprava niejak asabliva mianie nie vabiła. Ale paśla dobraachvotnickich bataljonaŭ majo mierkavańnie źmianiłasia, ciapier vajskovaja słužba mnie spadabałasia.
Belsat.eu: Cikava, a jakija ŭ vas płany na budučyniu? U Biełarusi vy pa-raniejšamu ličyciesia «najmitam» i vam pahražaje kryminalnaja adkaznaść.
Alaksandr Małčanaŭ: Tak, užo daŭno z hetym źmiryŭsia. Kali jechaŭ va Ukrainu, užo dumaŭ pra heta.
Apošni raz byŭ u Biełarusi niedzie hod tamu, paśla čaho mianie abvieścili ŭ vyšuk. Ciapier ja nie mahu viarnucca.
Belsat.eu: Na minułym tydni stała viadoma, što dva biełaruskich vałanciory — Rustem Dok i Źmicier Biełahorcaŭ — paprasili prytułak u Polščy. Kažuć, što va Ukrainie im nie dajuć dakumientaŭ. I nibyta va ŭkrainskich administracyjach pa spravach zamiežnikaŭ pahražajuć departacyjaj u Biełaruś.
Alaksandr Małčanaŭ: Ja nie čuŭ pra toje, što jany paprasili prytułak. U mianie pakul tut nievialiki infarmacyjny vakuum, nie zaŭsiody mahu ŭsie naviny pračytać (razmova adbyłasia 29 žniŭnia. — Belsat.eu). Doka ja ŭ pryncypie viedaju, pierasiakaŭsia ź im niekalki razoŭ. Druhoha čałavieka nie viedaju. Što datyčyć dakumientaŭ, to, ščyra kažučy, asablivych prablemaŭ u mianie nie ŭźnikała. Ale ja dumaju, što sapraŭdy jość peŭnaja prablema ź lehalizacyjaj.
Naprykład, u mianie ciapier užo jość vajskovy bilet, jon mnie zamianiaje ŭsie inšyja dakumienty. Padčas słužby ŭ vojsku ja mahu z hetym biletam całkam lehalna znachodzicca va Ukrainie. A paśla troch hadoŭ słužby ja mahu padavać zajaŭku na atrymańnie hramadzianstva.
Viadoma, pahladzim, što budzie praz try hady. Ale, jak bačycie, pakul prablemaŭ u mianie niama. U mianie jość časovy vid na žycharstva, chutka jon zakančvajecca, ale jon dla mianie nie abaviazkovy. Navat nie viedaju, ci budu jaho praciahvać: zaraz ja vielmi abmiežavany ŭ časie. Usio ž słužba jość słužba. Nie zaŭsiody mahu rasparadžacca svaim časam, jak chacieŭ by.
Belsat.eu: U toj ža čas ukrainski narodny deputat Ihar Huź kaža, što jość damoŭlenaść vydavać vidy na žycharstva zamiežnikam, jakija zmahalisia za Ukrainu na Danbasie. A zajaŭka na prytułak Doka i Źmitra Biełahorcava, na dumku deputata, moža być źviazanaja z tym, što jany «nie da kanca chacieli być va Ukrainie».
Alaksandr Małčanaŭ: Ja nie viedaju pra takuju damoŭlenaść, ja atrymlivaŭ vid na žycharstva krychu pa inšaj schiemie. Ale prablemaŭ u mianie nie było.
Belsat.eu: A što ŭvohule dumajecie pra sprobu atrymać palityčny prytułak u Polščy?
Alaksandr Małčanaŭ: Sprava kožnaha čałavieka, jak pastupać. Da prykładu, mianie maja situacyja pakul zadavalniaje.
Kaniečnie, hramadzianstva chaciełasia b užo ciapier, ale i siońniašni status zadavalniaje. Hałoŭnaje, kab jon nie źmianiaŭsia ŭ niejki horšy bok.
U bližejšy čas ja płanuju zastavacca va Ukrainie, kali tut nie ŭźniknie niejkich prablemaŭ. Pakul usio narmalna.
Pavodle infarmacyi Belsat.eu, vypadak Alaksandra Małčanava — nie adziny. Inšyja biełaruskija dobraachvotniki taksama dałučylisia da ŭkrainskaha vojska, kab lehalizavacca va Ukrainie.