Kabiakoŭ: Inflacyju ŭ 2016 hodzie ŭdasca ŭtrymać u miežach 12%
Va ŭradzie Biełarusi raźličvajuć utrymać inflacyju ŭ 2016 hodzie ŭ miežach 12%. Pra heta zajaviŭ premjer-ministr Andrej Kabiakoŭ 23 žniŭnia pavodle vynikaŭ sustrečy Alaksandra Łukašenki z kiraŭnictvam urada i Nacbanka.
«My infarmavali, što, na žal, u toj matrycy zadač, jakaja vyznačanaja kiraŭnikom dziaržavy, ź siami pakazčykaŭ vykanany adzin, ale vielmi važny. Heta pakazčyk inflacyi. My ŭžo ŭvajšli ŭ narmalny režym i raźličvajem, što pavodle vynikaŭ hoda, jak i mierkavałasia, inflacyja nie pieravysić 12%», — skazaŭ Kabiakoŭ.
Premjer-ministr paviedamiŭ, što na praciahu pieršaj pałovy žniŭnia «navat nazirałasia deflacyja, jakaja ŭ tym liku źviazanaja ź siezonnym faktaram».
Pavodle jaho słoŭ, kiraŭnika dziaržavy taksama prainfarmavali, što pa bolšaści astatnich pakazčykaŭ pracy ekanomiki «prysutničaje stanoŭčaja dynamika, jakaja charaktaryzuje jakasnyja źmieny ŭ ekanomicy». «My pastupova viartajemsia na trajektoryju adnaŭleńnia ekanamičnaha rostu», — zajaviŭ Kabiakoŭ.
Jon adznačyŭ, što na naradzie Łukašenku «padrabiazna prainfarmavali ab situacyi na źniešnich rynkach, suadnosinach ekspartu i impartu, płaciežnym bałansie krainy, abmierkavanyja pytańni, jakija tyčacca funkcyjanavańnia prablemnych dziaržpradpryjemstvaŭ, razhledžanaje vykanańnie prahramnych mier pa skaračeńni pierakryžavanaha subsidavańnia ŭ śfiery ŽKH».
Staršynia praŭleńnia Nacyjanalnaha banka Pavieł Kałaur paviedamiŭ pra situacyju na valutnym rynku i ŭ bankaŭskim siektary. Dalejšyja dziejańni pa źnižeńni staŭki refinansavańnia buduć ciesna ŭviazanyja z płaciežnym bałansam krainy, zajaviŭ Kałaur. «Što da dalejšych krokaŭ, biezumoŭna, my budziem pastupać vielmi ŭzvažana, aściarožna, aceńvajučy ŭ pieršuju čarhu stan płaciežnaha bałansu, robiačy adpaviednyja prahnozy na budučyniu», — skazaŭ jon.
«Pazityŭnyja vyniki manietarnaj palityki šmat u čym abumoŭlenyja tymi mierami, jakija prymajucca ŭ fiskalnaj i ekanamičnaj śfierach. Pravodziačy takuju zbałansavanuju palityku, majučy pazityŭny vynik pa inflacyi, pa situacyi na valutnym rynku, praŭleńnie Nacbanka śviadoma i całkam prafiesijna zrabiła vybar u častcy taho, kab jašče raz źnizić staŭku refinansavańnia. My viedajem, što heta klikała peŭnuju dyskusiju hramadskaści. Ale tym nie mienš heta absalutna śviadomyja i prafiesijnyja dziejańni z ulikam toj makraekanamičnaj situacyi, jakaja składvajecca ŭ ekanomicy», — adznačyŭ Kałaur.
Staŭka refinansavańnia 17 žniŭnia była źnižanaja na 2 pracentnyja punkty da 18% hadavych.
