Pamier abaviazkovaha prodažu valuty dla pradpryjemstvaŭ-eksparcioraŭ budzie źnižany
Z 1 vieraśnia pamier abaviazkovaha prodažu zamiežnaj valuty dla biełaruskich pradpryjemstvaŭ-eksparcioraŭ budzie źnižany z 30 da 20% ad sumy vyručki ŭ zamiežnaj valucie.
Takoje rašeńnie pryniaŭ Nacyjanalny bank 1 žniŭnia «ŭ ramkach praviadzieńnia mierapryjemstvaŭ pa paetapnaj libieralizacyi valutnych adnosin», paviedamlaje ŭpraŭleńnie infarmacyi i hramadskich suviaziaŭ Nacbanka.
«Hetaja miera daść mahčymaść uźniać inviestycyjnuju i dziełavuju aktyŭnaść subjektaŭ haspadarańnia Respubliki Biełaruś, stanie dadatkovym krokam u napramku harmanizacyi valutnaha zakanadaŭstva ŭ ramkach Jeŭrazijskaha ekanamičnaha sajuza i budzie spryjać stvareńniu roŭnych umoŭ dla ekanamičnych subjektaŭ dziaržaŭ JEAES pa raźvićci ich ekspartnaha patencyjału», — adznačajecca ŭ paviedamleńni.
Zhodna ź dziejnym u Biełarusi zakanadaŭstvam 30% atrymanaj valutnaj vyručki eksparciory pavinny abmieńvać na rubli. Takaja sistema źjaŭlajecca svojeasablivym strachovačnym miechanizmam, jaki dazvalaje dziaržavie zabiaśpiečyć stabilnuju prapanovu zamiežnaj valuty na ŭnutranym rynku, adznačajuć analityki.
Kali ŭ kancy 2014 — pačatku 2015 hadoŭ Biełaruś pieražyvała čarhovy valutny kryzis, narmatyŭ abaviazkovaha prodažu valuty byŭ pavialičany z 30% da 50%. Sa stabilizacyjaj situacyi jon viarnuŭsia na raniejšy 30-pracentny ŭzrovień.
Pavodle infarmacyi BiełaPAN, stratehija raźvićcia finansavaha rynku da 2020 hoda, jakuju ciapier rychtuje Nacbank, miarkuje admienu abaviazkovaha prodažu valutnaj vyručki.
