U «Rasatamie» zajavili pra hatoŭnaść zamianić korpus reaktara dla BiełAES
Fota grodnonews.by.
Dziaržkarparacyja «Rasatam» hatova zamianić korpus reaktara dla Biełaruskaj AES, ź jakim adbyŭsia incydent 10 lipienia. Pra heta zajaviŭ pieršy namieśnik hienieralnaha dyrektara «Rasatama» Alaksandr Łakšyn u intervju, raźmieščanym na sajcie karparacyi «ŭ suviazi sa šmatlikimi čutkami pra zdareńnie na budaŭničaj placoŭcy pieršaj Biełaruskaj AES».»Vyniki ŭsich daśledavańniaŭ pieradadzieny zakazčyku, — adznačyŭ Łakšyn. — My absalutna pierakananyja, što techničnych pieraškod dla vykarystańnia korpusa nie isnuje. Ale my razumiejem, što razam z pryjarytetam biaśpieki i nadziejnaści jašče adnoj najvažniejšaj umovaj raźvićcia atamnaj enierhietyki źjaŭlajecca hramadskaja prymalnaść. Dapuskajem, što zakazčyk moža pryniać rašeńnie nie prymianiać hety korpus, kab pahasić chvalu čutak i ažyjataž siarod častki nasielnictva».
«Kali takoje rašeńnie budzie pryniata, my hatovyja jaho ŭličyć, bo razumiejem asablivaje značeńnie hramadskaj prymalnaści pry budaŭnictvie pieršaj u krainie AES, — dadaŭ pradstaŭnik «Rasatama». — Tady na pieršym błoku budzie ŭstanoŭleny korpus reaktara, jaki pryznačaŭsia dla druhoha błoka. Jaho vyrab u ciapierašni čas zakančvajecca. Ale heta rašeńnie zakazčyka, viadoma, pryviadzie da niekatoraha zruchu hrafika zaviaršeńnia budavańnia enierhabłoka».
Łakšyn taksama vykłaŭ svaju viersiju incydentu. Pavodle jaho słoŭ, u noč z 9 na 10 lipienia adna z subpadradnych arhanizacyj vykonvała apieracyi pa pieramiaščeńni korpusa reaktara z adnaho łažamienta na druhi.
«Heta adbyvałasia nie ŭ budynku reaktarnaha adździaleńnia, bo išła jašče tolki padrychtoŭka da padjomu korpusa reaktara ŭ enierhabłok. Korpus reaktara płanavałasia pieramiaścić na adlehłaść kala 10 mietraŭ, nie źmianiajučy jaho haryzantalnaha stanovišča. Adnak pry strapoŭcy subpadradčykam byli dapuščanyja adchileńni ad instrukcyi, z-za jakich adbyŭsia pierakos hruzu pry jaho padjomie, — zajaviŭ Łakšyn. — Na vyšyni kala 4 mietraŭ (pry daŭžyni vyrabu 11 mietraŭ) uźnikła niaspraŭnaść padjomnaha krana, z pryčyny čaho korpus zastavaŭsia ŭ padviešanym stanie bolš za paŭhadziny. Uvieś hety čas pierakos pastupova pavialičvaŭsia i ŭ vyniku pryvioŭ da taho, što korpus reaktara praśliznuŭ pa stropach i pavis dyjahanalna, dakranuŭšysia da ziamli».
Pradstaŭnik «Rasatama» taksama paviedamiŭ, što na praciahu ŭsiaho pracesu «viałasia niaspynnaja videazdymka i zabiaśpiečvałasia rehistracyja namahańniaŭ na kruku krana». «Navat u momant dotyku da ziamli asnoŭnaja vaha vyrabu — bolš za dźvie traciny — utrymlivałasia kranam. Tamu vykarystoŭvać takija słovy, jak «udar ab ziamlu» ci «padzieńnie», niapravilna, heta ŭvodzić ludziej u zman, tamu što skažaje sutnaść taho, što adbyłosia, bo chutkaść ruchu korpusa nie pieravyšała chutkaści piešachoda», — śćviardžaje Łakšyn.
Na pytańnie, čamu pra heta stała viadoma tolki ciapier, jon adkazaŭ: «U atamnaj halinie jość vyraznyja rehłamienty i praviły, jakija vyznačajuć, što źjaŭlajecca padziejami, pra jakija treba infarmavać nahladnyja orhany i hramadskaść. Jany apisvajuć pamier škody abo ŭździejańnia na piersanał, abstalavańnie i navakolnaje asiarodździe. U hetym vypadku nijakaj padziei, što pryviała da jakoj-niebudź škody, nie adbyłosia. Maksimum, pra što možna kazać, — pra ścirańnie na korpusie zavodskaj farby z-za treńnia mietaličnych strop».
Pavodle słoŭ pieršaha namieśnika kiraŭnika «Rasatama», instrukcyja pa strapoŭcy hruzu «była vykanana z adchileńniami». «Subpadradnaja arhanizacyja atrymała adpaviednaje pakarańnie, a jaje rabotniki, vinavatyja ŭ hetym parušeńni, adchileny ad vykanańnia abaviazkaŭ i bolš nikoli nie buduć dapuščanyja da rabot na našych atamnych abjektach. Ale, padkreślivaju, nie tamu, što adbyłosia niešta z korpusam. Ich pamyłka pa fakcie pryviała da prypynku mantažu abstalavańnia. Bolš za toje, u infarmacyjnym poli ŭźnikli sumnievy ŭ metazhodnaści vykarystańnia hetaha korpusa, što jak minimum źjaŭlajecca reputacyjnaj škodaj. Voś ŭ hetym vina hetych ludziej i ŭ cełym subpadradnaj arhanizacyi», — zajaviŭ Łakšyn.
Razam z tym jon padkreśliŭ, što nijakich istotnych uździejańniaŭ, jakija mahli b pryvieści da źmieny ułaścivaściaŭ korpusa, nie adbyłosia. «Pakazańni pryboraŭ i raźliki pierakanaŭča dakazvajuć, što maksimalnaja nahruzka na korpus była šmatrazova mienš dapuščalnaj i ŭ paŭtara razu nižejšaj navat za tuju, jakuju jon vytrymlivaje bieśpierapynna ŭ režymie narmalnaj ekspłuatacyi na praciahu šaścidziesiaci hadoŭ», — śćviardžaje pradstaŭnik «Rasatama».
Tym nie mienš, adznačyŭ jon, kab źniać lubyja mahčymyja sumnievy zakazčyka, «Rasatam» vyrašyŭ pravieści dadatkovyja daśledavańni. Śpiecyjalisty hałoŭnaha kanstruktara reaktarnaj ustanoŭki DKB «Hidrapres» i vytvorcy korpusa zavoda «Atammaš» vykanali kantrolnyja vymiareńnia, uklučajučy ŭltrahukavy kantrol mietału i defiektaskapii zvarnych złučeńniaŭ. «Vyniki paćvierdzili, što nijakich źmienaŭ stanu korpusa nie adbyłosia», — jašče raz zajaviŭ kiraŭnik dziaržkarparacyi.
Nahadajem, 25 lipienia biełaruskija ŚMI paviedamili, što 10 krasavika padčas trenirovačnaj probnaj ustanoŭki korpusa reaktara 330-tonny ahrehat sarvaŭsia i ŭpaŭ z vyšyni ad 2 da 4 mietraŭ. Hienpadradčyk budaŭnictva stancyi — rasijskaja hrupa kampanij «ABE» — paśpiašaŭsia abvierhnuć hetu infarmacyju, adnak Minenierha Biełarusi pryznała, što na stancyi mieła miesca «niaštatnaja situacyja». «Niaštatnaja situacyja adbyłasia na placoŭcy zachoŭvańnia korpusa reaktara pry praviadzieńni takiełažnych rabot pa jaho pieramiaščeńni ŭ haryzantalnaj płoskaści», — havaryłasia ŭ paviedamleńni Minenierha.
Incydent atrymaŭ šyroki hramadski rezanans u Biełarusi i za miažoj.
Litva nakiravała Biełarusi čarhovuju notu, u jakoj zapytała vyniki rasśledavańnia niadaŭniaha incydentu na AES, jakaja budujecca. «Hety incydent razhladajecca Litvoj jak asabliva niebiaśpiečny i zdolny vyklikać niezvarotnyja admoŭnyja nastupstvy dla biaśpieki AES, jakaja budujecca», — havaryłasia ŭ nocie litoŭskaha MZS.
Litva prapanavała Biełarusi zasnavać mižnarodnuju kamisiju ekśpiertaŭ dla analizu vynikaŭ hetaha rasśledavańnia i pradstaŭleńnia rekamiendacyj, a taksama vykazała zaniepakojenaść nakont prazrystaści prajekta BiełAES, niedachopu kultury biaśpieki i nieadpaviednaści mižnarodnym standartam pa atamnaj biaśpiecy i achovie navakolnaha asiarodździa, niedastatkovaj roli rehulatara jadziernaj biaśpieki Biełarusi i hienieralnaha padradčyka budaŭnictva pry arhanizacyi biaśpieki budaŭničych rabot.
Litoŭski bok paprasiŭ aktyŭnaha ŭmiašańnia ES u vyrašeńnie pytańnia jadziernaj biaśpieki, važnaha dla ŭsiaho rehijonu, a taksama źviarnuŭsia da kiraŭnictva MAHATE z prośbaj udzielničać u rasśledavańni incydentaŭ, jakija adbylisia na AES, što budujecca.
Varta adznačyć, što heta ŭžo nie pieršaje paviedamleńnie ab NZ na budaŭničaj placoŭcy stancyi. Infarmacyja pra dva inšyja incydenty źjaŭlałasia ŭ ŚMI ŭ mai i červieni.
Minenierha pryznała niaštatnuju situacyju pry ŭźviadzieńni biełaruskaj AEC: 330-tonny reaktar upaŭ
