Miadźviedzik Topa: Ludzi prahałasavali suprać dyletanctva na biełaruskim TB
Miadźviedzik Topa ź dziciačaj «Kałychanki» staŭ najlepšym biełaruskim televiadoŭcam pa mierkavańni hledačoŭ. Taki vynik internet-hałasavańnia na sajcie telekanała. Za Topu, jakoha ahučvaje aktor Uładzimir Varankoŭ, prahałasavali 38% udzielnikaŭ. Hałasavańnie pačałosia 14 maja i zaviaršyłasia a 12-j hadzinie 19 maja. Asabliva aktyŭna za Topu ahitavali hałasavać karystalniki sacsietak. Niahledziačy na abmiežavańni, nakładzienyja arhanizatarami konkursu, piersanaž Miadźviedzik Topa pahadziŭsia pahavaryć ź Jeŭraradyjo.
ok.ru
— Spadar Topa, čamu mienavita vy pieramahli ŭ hałasavańni, jak vy dumajecie?
— Viedajecie, heta, imavierna, było dla ekśpierymienta. Jany ž navat imia artysta nie prapisali, tak i paznačyli — Miadźviedzik Topa. Vidać, surjoznaha značeńnia nie nadavali. A kali pačałosia hałasavańnie, ludzi pačali telefanavać, to jany havaryli, što hałasavali nie stolki za mianie, kolki suprać nieprafiesijanalizmu i dyletanctva.
— Vy ličycie, što hałasavali nie za vas, a suprać inšych?
— Telebačańnie zapałanili ludzi, nastolki ad jaho dalokija, što ich nichto nie viedaje. Topu viedajuć, «Kałychanku» viedajuć 35 hadoŭ. My prafiesijanały, nikoha nikoli nie padmanvali. Tamu ludzi addavali hołas za tych, kaho viedali. A nie za tyja proźviščy i ludziej, kaho im naviazvali… Nielha ž addavać hałoŭny pryz krainy tym, kaho nie bačyš i nie viedaješ. Pamiž saboj možna što chočaš dzialić. Ale kali zapuścili hałasavańnie dla ŭsioj krainy, to adrazu ŭspłyło imia aŭtara… Mahčyma, jany i nie čakali takoha. Dumali, voś na sajcie STV zapuściać, svaje cichieńka prahałasujuć. A tut taki vybuch.
— Ciapier Miadźviedzik Topa staŭ jašče bolš zornym. Mahčyma, jon zachoča pasprabavać siabie ŭ jakaści viadučaha i na inšych pieradačach?
— Nu ŭ nas ža, akramia «Kałychanki», jość inšyja pieradačy. 5 hadoŭ my ŭžo viadziem «Dabraranak». My ciapier dziaciej i budzim jašče, u škołu, u sadzik. A viečaram układvajem spać. Nu i ciapier razhladajecca varyjant, kab pa vychodnych dniach na «Biełaruś 3» byli dzionnyja zabaŭlalnyja prahramy dla dziaciej. Dziaciej možna vychoŭvać nie tolki ŭ kamputarach, zaraz uspomnili pra heta. My i ŭ mahiloŭskim fiestyvali «Animajoŭka» udzielničajem. Jedziem tudy jak piersanažy, adkryvajem jaho. Dzieci čym dalej ad stalicy, tym bolš lubiać nas. Kładucca spać z nami i razam ustajuć.
— A vy sami hladzicie telebačańnie? Što lubicie?
— Nu viadoma. Ja ž televizijny hladač. I vielmi zyčlivy. Užo 30 hadoŭ pracuju… Ja lublu hladzieć pieradačy. I jość lubimyja. Pačynajučy sa spartyŭnych i zakančvajučy «Bitvami ekstrasensaŭ». Šmat znajomych na telebačańni, prosiać pahladzieć ich pieradačy. Ja hladžu dla cikaŭnaści, dla raźvićcia. Ja nie zamykajusia na niečym. Nie havaru, što voś heta hladžu, a voś heta — nie. Hladzieć treba i dobraje, i drennaje. I kali jość mahčymaść, to stvarać hetaje dobraje.
— Spadar Topa, vy ciapier užo zorka nie tolki telebačańnia, ale navat i internetu, sacyjalnych sietak. Vas viedajuć usie. Mahčyma, vy chacieli b zaprasić da siabie ŭ pieradaču niejkuju zorku? Ciapier vam nichto nie admović.
— Viedajecie, sioleta było 35 hadoŭ «Kałychancy» i 30 hadoŭ majho ŭdziełu ŭ joj. Heta anansavałasia. I my chadzili pa našych prahramach, i nam usie zorki havaryli, što hanaracca, što voś taki piersanaž Miadźviedzik Topa da ich zavitaŭ. U nas u «Dabraranku» jość taki farmat, što da nas prychodziać hości. I jašče nie było takoha, kab niechta admoviŭsia. Usie prychodziać z radaściu. I madeli, i ŭsie inšyja. My ŭžo prajšli taki etap, kali niechta advaročvaŭsia, havaryŭ, što nie, nie pajdu. Da nas ciapier usie z radaściu iduć, možam luboha čałavieka paklikać.
