Ministerstva infarmacyi: z supracoŭnikami telekanała ANT praviedziena dadatkovaja tłumačalnaja hutarka
Pravaabaronca Andrej Pałuda dniami atrymaŭ adkaz ź Ministerstva infarmacyi na svoj zvarot da Lilii Ananič pa fakcie parušeńnia prezumpcyi nievinavataści viadučym telekanała ANT u dačynieńni da abvinavačanaha pa spravie Julii Bałykinaj.
Ministerstva infarmacyi pahadziłasia z dovadami pravaabaroncy pra niedapuščalnaść parušeńnia pravoŭ i svabodaŭ asobaŭ z boku ŚMI. I adreahavała takim čynam, što ŭ ZAT «Druhi nacyjanalny telekanał» z usimi žurnalistami dyrekcyi infarmacyjnaha viaščańnia, a taksama supracoŭnikami, adkaznymi za padrychtoŭku i vypusk infarmacyjnych materyjałaŭ, była praviedziena dadatkovaja tłumačalnaja hutarka.
Nahadajem, u skarzie Andrej Pałuda prasiŭ vynieści papiaredžańnie telekanału «ANT» i pravieści hutarku.
«Vidać, «paŭnamoctvaŭ» Ministerstva infarmacyi chapiła tolki na toje, kab pravieści paŭtornuju hutarku z pradstaŭnikami dziaržaŭnaha telekanała», - zaklučaje pravaabaronca.
I źviartaje ŭvahu, što taki padychod z boku Ministerstva možna acharaktaryzavać jak vybaračny, bo viadomy vypadki, kali niezaležnym ŚMI nieadnojčy vynosilisia papiaredžańni za niedakładnaści ŭ infarmacyi. Tak, naprykład, 2 sakavika 2016 hoda Ministerstva infarmacyi vyniesła piśmovyja papiaredžańni uładalnikam infarmacyjnych resursaŭ Ej.by i NN.by.
6 krasavika na telekanale ANT u vypusku navin vyjšaŭ siužet, padčas jakoha viadučy zajaviŭ: «Zakončieno rasśledovanije hromkoho dieła, ubijcu lehkoatletki Julii Bałykinoj mohut prihovoriť k isklučitielnoj mierie nakazanija, siehodnia ob etom soobŝili v Śledstviennom komitietie. Dokazano, čto mužčina nachodiłsia pod vozdiejstvijem narkotikov, i v ssorie 12 raz udarił sportsmienku mołotkom i t.d.».
Takim čynam, zatrymany pradstaŭleny z samoha pačatku jak złačynca, niahledziačy na toje, što pakul nieviadoma, jakoje rašeńnie vyniasie sudovaja instancyja.
