Masavaje źjaŭleńnie prarasijskich arhanizacyj u Biełarusi supała z adkryćciom «Rassupracoŭnictvam» «centraŭ navuki i kultury» — daśje
Ukrainski daśledčy sajt, jaki paraŭnoŭvajuć z WikiLeaks, pramanitoryŭ dziejnaść militaryzavanych prarasijskich supołak u Biełarusi dla acenki mahčymaści padryŭnych dziejańniaŭ ź ich boku ŭ našaj krainie.
Za asnovu daśledčyki InformNapalm'a uziali niadaŭni artykuł «Našaj Nivy» pra małaletnich «voinaŭ Chrysta» z Hrodzienščyny.
Masavaje źjaŭleńnie prarasijskich arhanizacyj u Biełarusi aŭtary InformNapalm'a źviazvajuć z adkryćciom «Rassupracoŭnictvam» «Rasijskaha centra navuki i kultury» u Minsku ŭ 2010 hodzie i ŭ Breście ŭ 2014-m.
U materyjale zhadvajecca kiraŭnik «Kazackaha spasu» Piatro Šapko, jaki byŭ zaŭvažany va ŭłasnaručnaj pieradačy «humanitarki» ruchu «Navarosija» Hirkina-Strałkova i sustrečach z kambatami bajavikoŭ.
Šapko pryhadvajuć jahonyja słovy pra toje, što «biełaruskaja mova — heta kitč, štučnaja».
Aŭtary źviartajuć uvahu, što pry ŭsim hetym Šapko treniruje niepaŭnaletnich biełaruskich dziaciej i padtrymlivaje suviazi z aktyvistam rasijskaha «Nacyjanalna-vyzvalenčaha ruchu» u Biełarusi Uładzimiram Ryžankovym, jaki čytačam «Našaj Nivy» zapomniŭsia svaimi zajavami pra štučnaść biełaruskaj movy i nacyjanalnaści.
Potym niekatoryja z hetych dziaciej, darečy, stanoviacca kursantami Vajskovaj akademii Biełarusi.
Zaniatki psieŭdakazakoŭ z małaletnimi dziećmi. Sprava — Piatro Šapko.
Taksama ŭ materyjale pryhadvajecca fakt «pierajmańnia dośviedu» instruktarami «Kazackaha spasa» u słužboŭcaŭ rasijskaj 45-j hvardziejskaj asobnaj bryhady śpiecyjalnaha pryznačeńnia.
«Sistema padrychtoŭki patencyjnych bajavikoŭ u «Kazackim spasie» achoplivaje dziaciej, pačynajučy z malenstva, i nahadvaje sistemu, jakaja isnuje ŭ isłamskim fundamientaliźmie i džychadyźmie. Dziaciej pryvučajuć da zbroi, vajny, dzielać śviet na svaich i čužych i, samaje prykraje, — pryvučajuć da hatoŭnaści addać žyćcio za niejkija naviazanyja zvonku mety, jakija čuždyja biełarusam», — pišuć aŭtary InformNapalma'a i pryhadvajuć taksama supravadžalnuju ideałahičnuju apracoŭku dziaciej, jakuju pravodziać śviatary Biełaruskaha ekzarchatu Rasijskaj Pravasłaŭnaj Carkvy.
Taksama aŭtary identyfikavali adnaho ź instruktaraŭ «Kazackaha spasu», jaki braŭ udzieł u sutyčcy ŭ «Domie Maskvy» padčas pryjezdu prapahandysta Starykava.
Čyrvonym abviedzieny Huk Michał Mikałajevič, jaki vyšturchoŭvaŭ Mikołu Dziemidzienku na sustrečy z rasijskim prapahandystam Starykavym.
«Varta taksama adznačyć, što za niekalki dzion da pryjezdu Starykava ŭ hetym ža budynku ŭrad Maskvy pravodziŭ kanfierencyju «Zachavańnie, padtrymka i prasoŭvańnie ruskaj kultury i movy ŭ zamiežžy», jakaja ciaham troch hadoŭ prachodziła ŭ Sievastopali, a paśla aneksii Kryma Rasijaj u 2014 hodzie pierajechała mienavita ŭ Minsk», — zaścierahaje InformNapalm.
Dalej aŭtary kažuć, što ŭ viadomaj bazie danych pra bajevikoŭ «Miratvorac» jany adšukali jašče adnaho siabra «Kazackaha spasu», minčuka Alaksandra Tałkačova. Ale pramych dokazaŭ, što jon vajavaŭ na Danbasie, maŭlaŭ, niama. Tamu treba padklučyć da rasśledavańnia śpiecsłužby i pravieryć «Kazacki spas» na datyčnaść da viarboŭki terarystaŭ, prapanujuć na sajcie.
Naprykancy materyjału aŭtary vykazvajuć zdahadku, što struktura «Kazacki spas», jakaja isnuje pad prykryćciom «Horada biez narkotykaŭ», atrymlivaje finansavańnie ad «Fondu Harčakova» — arhanizacyi, jakaja stavić svajoj metaj «prasoŭvańnie zamiežnapalityčnych intaresaŭ Rasii».
Šapko na «Akademii biaśpieki» ŭ Maskvie.
«Nie vyklučana, što metaj vajskovaj padrychtoŭki patencyjnych bajavikoŭ «ruskaha śvietu» na terytoryi Biełarusi moža być scenar pa destabilizacyi situacyi ŭ krainie z metaj padaŭleńnia mahčymaha supracivu prabiełaruskich siłavikoŭ i namienkłatury», — padahulniajuć aŭtary i nahadvajuć, što padobnuju dziejnaść Rasija ŭžo razhortvała raniej na ŭkrainskim Danbasie.
