Ułady dazvolili Partyi BNF adśviatkavać u Słucku ŭhodki Zbrojnaha čynu
Słucki rajvykankam dazvoliŭ pravieści ŭ horadzie 28 listapada demanstracyju i mitynh z nahody 95-j hadaviny Słuckaha zbrojnaha čynu. Adpaviednaje rašeńnie atrymali zajaŭniki akcyi — staršynia Partyi BNF Alaksiej Janukievič i kiraŭnik słuckaj arhanizacyi partyi Vital Amialkovič.
Jak paviedamlaje pres-słužba Partyi BNF, na arhanizataraŭ demanstracyi i mitynhu ŭskładajecca abaviazak zabiaśpiečyć hramadski paradak u adpaviednaści z zakanadaŭstvam.
Mierapryjemstva raspačniecca ŭ 14.30 zboram udzielnikaŭ la budynka Słuckaha krajaznaŭčaha muzieja. Adtul kałona demanstrantaŭ rušyć pa chodnikach da haradskoha parka kultury i adpačynku na vulicy Vilenskaj, dzie zapłanavany ŭračysty mitynh ušanavańnia pamiaci ŭdzielnikaŭ Słuckaha paŭstańnia 1920 hoda.
U akcyi płanujuć uziać udzieł pradstaŭniki Partyi BNF, ruchu «Za Svabodu», ruchu salidarnaści «Razam», arhanizacyi «Moładź BNF» dy inšych abjadnańniaŭ. Mižnarodnaje hramadskaje abjadnańnie «Małady front» (Čechija) maje namier pravieści hanarovaje pryniaćcie prysiahi novymi aktyvistami arhanizacyi.
«Zaraz viaducca taksama pieramovy pra praviadzieńnie paśla mitynhu ŭ Słucku tvorčaj sustrečy z historykami, jakija daśledujuć padziei antybalšavickaha supracivu na Słuččynie», — havorycca ŭ paviedamleńni.
Słucki zbrojny čyn 1920 hoda byŭ sprobaj abarony niezaležnaści Biełarusi ŭ rajonie Słucka. Na praciahu miesiaca, u listapadzie—śniežni, vajennyja atrady, sfarmiravanyja pieravažna ź miascovych sialan, akazvali supraciŭleńnie savieckim vojskam.
