Łukašenka dazvoliŭ vydzialać dziaržaŭnaje arendnaje žytło asobam nie ź dziaržsłužby, ale ŭklučanym u kadravyja rejestry kiraŭnika dziaržavy, urada, vykankamaŭ
Alaksandr Łukašenka dazvoliŭ vydzialać inšym hramadzianam arendnaje žyllo, pryznačanaje dla dziaržaŭnych słužačych. 24 červienia jon padpisaŭ ukaz № 258, jaki ŭnosić adpaviednyja źmieny va ŭkaz № 535 ad 17 listapada 2014 hoda, što ŭstanaŭlivaje paradak davańnia arendnaha žylla dziaržsłužačym i pieralik pasadaŭ, jakim takoje žyllo naležyć vydzialać, paviedamlaje pres-słužba prezidenta.
U novym ukazie havorycca, što pry adsutnaści nieabchodnaści zabieśpiačeńnia arendnym žyllom dziaržaŭnych słužačych praduhledžvajecca mahčymaść davańnia hetaha žylla inšym hramadzianam, jakija zajmajuć pasady, uklučanyja ŭ kadravyja rejestry kiraŭnika dziaržavy, urada, abłvykankamaŭ, Minskaha harvykankama, rajonnych, haradskich vykankamaŭ. Pry hetym umovami davańnia im takoha žylla źjaŭlajucca adsutnaść va ŭłasnaści i (abo) u vałodańni i vykarystańni žyłych pamiaškańniaŭ u nasielenym punkcie pa miescy pracy abo słužby, a taksama indyvidualnaha chadajnictva dziaržorhanaŭ i arhanizacyj, jakija źjaŭlajucca ich najmalnikami.
Rašeńni ab davańni arendnaha žylla buduć prymacca Kiraŭnictvam spravami prezidenta, abłvykankamami i Minskim harvykankamam. Arendnaje žyllo budzie vydzialacca časova da ŭźniknieńnia nieabchodnaści jaho vydzialeńnia dziaržaŭnym słužačym, ale nie zvyš terminu pracoŭnych ci słužbovych adnosinaŭ z hramadzianami.
Pieralik pasadaŭ, pry zajmańni jakich mahčymaje atrymańnie arendnaha žylla dla dziaržsłužačych, uklučaje 61 pazicyju. Na pieryjad pracoŭnych adnosinaŭ pa vydzialeńnie arendnaj kvatery moža źviarnucca ŭ tym liku i prezident.
Košt budaŭnictva 1 kv. m ahulnaj płoščy arendnaha žylla dla čynoŭnikaŭ nie pavinna pieravyšać 8,5 młn rubloŭ, «kali inšaje nie ŭstanoŭlena prezidentam». Kvatery pavodle žadańnia arandatara mohuć być abstalavanyja bytavoj technikaj i inšaj majomaściu, pry hetym raschody na ich nabyćcio abmiežavanyja 25% ad kaštarysnaha koštu budaŭnictva žylla.
Płošča ziamielnaha ŭčastka, jaki vydzialajecca dla budaŭnictva adnakvaternaha doma dla zdačy ŭ arendu dziaržsłužačym, nie pavinna pieravyšać 1 tys. kv. m, a ahulnaja płošča doma — 150 kv. m. Dla arendnych kvater u šmatkvaternych damach dapuščalnaja płošča abmiažoŭvajecca 130 kv. m.
