Juryj Čyž dabudoŭvaje pad Minskam svaje novyja rezidencyi — repartaž
Siamja miljaniera atrymała try susiednija ŭčastki pad Łahojskam.
Novy katedž miljaniera
Samy bahaty biełaruski biznesmien Juryj Čyž zakančvaje čarhovuju budoŭlu. Na hety raz havorka nie pra šmatpaviarchoviki ŭ Minsku, a pra jahonaje asabistaje žyllo. Čyž užo maje katedž u staličnych Drazdach, samym prestyžnym kvartale Biełarusi, ale ciapier vyrašyŭ mieć i majontak za miežami Minska. Jahony novy dom znachodzicca kala Łahojska.
Katedžny pasiołak «Łahožask» — prajekt kampanii «Trajpł», jakaja naležyć samomu Juryju Čyžu. U siaredzinie 2000-ch byŭ stvorany harnałyžny kompleks «Łahojsk», toj adkryŭsia 10 hadoŭ tamu. A paśla Čyž vyrašyŭ pabudavać žyłyja damy kala jaho.
Klijentam prapanoŭvalisia hatovyja katedžy pa $420 tysiač.
Popytam jany nie karystalisia, tamu Čyž staŭ pradavać naŭprost ziamlu, pa $120 tysiač za nadzieł. Ale i pa takoj biznes-schiemie «Łahožask» nie prynios čakanaha prybytku.
Pavodle dadzienych zabudoŭščyka, dahetul stajać niepradadzienymi paŭtara dziasiatka ŭčastkaŭ. Nie prapadać ža dabru, vyrašyŭ Juryj Čyž i ŭziaŭ niekalki nadziełaŭ sabie.
8 žniŭnia 2014 hoda Łahojski sielski vykanaŭčy kamitet pryniaŭ rašeńnie pieradać u pryvatnuju ŭłasnaść dva ŭčastki pa 25 sotak. Adzin zapisali na samoha miljaniera, druhi — na jahonuju žonku Śviatłanu. Na sajcie «Łahožaska» paznačana, što hetyja nadzieły buduć zabudoŭvacca pa «indyvidualnym prajekcie». Zrešty, vonkava katedžy nie vyłučajucca siarod susiednich damoŭ.
Kala doma Śviatłany ciapier zaljuć basiejn
Architekturnaja asablivaść pasiołka ŭ tym, što pieršyja pavierchi ablicavanyja kamieniem, a druhija — drevam. U novym domie Čyža dva pavierchi, padvał i mansarda.
Ahulnaja płošča katedža vielizarnaja, ažno 875 m2. U dvary zapłanavana łaźnia. Dom, zapisany na žonku, trochi mienšy, kala 560 m2. Ale, pakolki zbudavańnie staić na schile hary, možna naličyć try pavierchi.
Pobač z domam budujuć letniuju kuchniu, kala jaje — adkryty basiejn. Abodva katedžy buduć zakrytyja ad susiedziaŭ vysokim draŭlanym płotam. A praz paru miesiacaŭ było vyrašana prydbać jašče adzin učastak. Jon byŭ aformleny na dačku Taćcianu. Pavodle dakumientaŭ, dziaŭčyna arandavała ziamlu na 10 hadoŭ.
Za svaje 25 sotak jana budzie štohod płacić Łahojskamu sielvykankamu pa 20 tysiač rubloŭ.
A sam katedž buduje ŭ ipateku, aformlenuju ŭ baćkavym «Trajple». Kab raźličycca, Taćciana pavinna addać kala 650 miljonaŭ rubloŭ (kala $60 tysiač na dzień padpisańnia damovy). Pakul što budaŭniki tolki zalivajuć padmurak u jaje budučym domie.
Usie try damy Čyžoŭ znachodziacca ŭ svojeasablivym tupiku vulicy Aziornaj, vakoł tolki drobny lasok, a za im — harnałyžny kurort.
***
Minskija majontki Čyžoŭ
Dom u Zacani ciapier naležyć starejšym dzieciam Čyža
Jak asoba, nabližanaja da Alaksandra Łukašenki, Juryj Čyž u siaredzinie 2000-ch atrymaŭ mahčymaść pastavić katedž u Drazdach, samym elitnym kvartale krainy. Tut jamu naležyć dvuchpaviarchovy dom płoščaj 431 m2. Ale pilnaj patreby ŭ novym žytle miljanier nie mieŭ. U 2003 hodzie jon atrymaŭ 25 sotak u staličnym rajonie Zacań, u achoŭnaj zonie vodazabora «Navinki». Tam była pabudavanaja vialikaja siadziba, jakuju Čyž ź ciaham času padzialiŭ miž starejšymi dziećmi. Narešcie, u «trajpłaŭskim» hmachu, jaki navis nad Trajeckim pradmieściem, Śviatłana Čyž maje piacipakajoŭku płoščaj kala 280 m2.
***
Juryj Čyž. Nar. u 1963 u vioscy Sabali Biarozaŭskaha rajona. Zakončyŭ BNTU. Majstar sportu SSSR pa hreka-rymskaj baraćbie. Fienamienalna paśpiachovy biznesmien. Ułaśnik roznahalinovaj impieryi «Trajpł», siarod jahonych biznes-intaresaŭ naftapierapracoŭka, budaŭnictva, transpartnyja pasłuhi, sielskaja haspadarka, vyrab budmateryjałaŭ, handal charčavańniem, adzieńniem i aŭto. Vałodaje restaranami, kłubami i futbolnaj kamandaj «Dynama» (Minsk). Zajmaje 1-je miesca ŭ rejtynhu samych paśpiachovych i ŭpłyvovych biełaruskich biznesmienaŭ. Trapiŭ pad sankcyi Jeŭrasajuza jak «kašalok Łukašenki». Žanaty, maje traich dziaciej.
***
Śviatłana Čyž. Naradziłasia ŭ 1966. U šlubie ź Juryjem Čyžom bolš za 20 hadoŭ. Kali dzieci padraśli, pasprabavała siabie ŭ biznesie. Jana adkryła ŭ Minsku elitny azdaraŭlenčy kłub EVO.
***
Troje dziaciej. Starejšy syn miljaniera, Siarhiej, naradziŭsia ŭ 1988 hodzie. U 16 hadoŭ pierajechaŭ u Łondan. Tut jon skončyŭ škołu, a paśla vučyŭsia ŭ Łondanskim i Oksfardskim univiersitetach. Viarnuŭšysia na radzimu, Siarhiej staŭ pracavać u struktury hipiermarkietaŭ «Prastor», potym uvajšoŭ u naziralnuju radu Minskaha zavoda pienistych vinaŭ jak pradstaŭnik «Trajpła». Dačce Taćcianie 24 hady, jana atrymała adukacyju ŭ Šviejcaryi, a ciapier zaniałasia restarannym i hatelnym biznesam baćki. Małodšamu synu Uładzimiru 19 hadoŭ, jon zajmajecca baraćboj, jak i tata.
***
Pryvatny dom-carkva. Adzin z susiednich z Čyžami damoŭ u «Łahožasku» zarehistravany na Kiryła Vachramiejeva (mirskoje imia mitrapalita Fiłareta). Jon nabyŭ zakansiervavanuju budoŭlu pa lhotnaj canie, usiaho za $25 tysiač, i pabudavaŭ katedž-carkvu. Jašče adzin dom Juryj Čyž naŭprost padaryŭ Biełaruskaj pravasłaŭnaj carkvie.
