Adamčyk, Alachnovič, Bahdanovič, Baradulin, Bykaŭ — u druk vychodzić sieryja biełaruskich kłasikaŭ u 26 tamach
23-24 červienia ŭ kramy pastupić 26 tamoŭ sieryi «Maja biełaruskaja kniha», jakuju vypuskaje vydaviectva «Papury». Sieryja pradstaŭlaje ź siabie zrez biełaruskaj litaratury — ad staražytnych lehiendaŭ, narodnych kazak, chrestamatyjnych i małaviadomych tvoraŭ kłasikaŭ da pracaŭ sučasnych piśmieńnikaŭ.
19 červienia nakład dadrukujuć, a 24 červienia ŭ kramie OZ.BY adbudziecca prezientacyja sieryi z udziełam krytykaŭ i maładych litarataraŭ. Sumarny nakład składzie bolš za 60 tysiač asobnikaŭ.
Kožnaja kniha vyjdzie nakładam 2—2,5 tysiačy asobnikaŭ. Kupić tvory možna budzie va ŭsich kramach OZ.BY i «Biełkniha», u jakoj bolš za 70 kropak pa Biełarusi.
Knihi buduć u miakkaj vokładcy kišennaha farmatu, i vydaŭcy abiacajuć, što košt adnaho asobnika nie budzie pieravyšać 100 tysiač rubloŭ.
«My chočam, kab biełaruskuju kłasiku sapraŭdy čytali i kab jana była dastupnaja, tamu vybrali demakratyčny farmat vypusku. Dyrektary «daŭno chacieli vydać biełaruskuju kłasiku. My biełaruskaje vydaviectva, a biełaruskich knih da hetaha momantu nie vydavali», — kažuć u vydaviectvie.
Nad prajektam na praciahu dvuch hadoŭ pracavali historyk, paet, vice-prezident Biełaruskaha PEN-centra Uładzimir Arłoŭ, piśmieńnik i litaraturaznaŭca, kandydat fiłałahičnych navuk Piatro Vasiučenka, fiłołah i hramadski dziejač Lavon Barščeŭski, litaraturaznaŭca, piśmieńnik, doktar fiłałahičnych navuk Michaś Tyčyna i piśmieńnik, pierakładčyk, vydaviec Uładzimir Siŭčykaŭ.
Meta prajekta — zrabić ajčynnych piśmieńnikaŭ bližej da biełarusaŭ, a čytačam dać šaniec znoŭku pračytać i acanić tvory, pradstaŭlenyja siaredniaj škołaj nie ŭ poŭnym abjomie, a časam «projdzienyja» tolki farmalna.