Top-5 samych darahich katedžaŭ krainy
Ceny dasiahajuć $2,5 miljona.
Paśla valutnaha kryzisu ceny na nieruchomaść pavolna papaŭźli ŭniz. Ale heta datyčycca pieradusim kvater u haradach, dzie cenaŭtvareńnie zbolšaha prazrystaje. A voś elitnaja nieruchomaść žyvie pa svaich zakonach.
Cana samych darahich damoŭ pieravyšaje $2 miljony, ale heta chutčej dekłaracyja ab namierach. Za takuju sumu biełaruskuju nieruchomaść nichto nie kuplaje — majučy svabodnyja hrošy, možna pabudavać taki samy dom značna tańniej. Niejki čas pražyŭšy z maraj pra bahataha zamiežnaha kupca, ryełtary źnižajuć canu.
1. $2,5 miljona — za vid na Kamiennuju Horku
Samym darahim domam ciapier staŭ cahlany katedž u Tarasavie. Heta niekalki kiłamietraŭ ad Minska. Italjanskaja ablicovačnaja plitka, niamieckaja santechnika, marmurovyja padłohi… I navat ułasnaja śvidravina hłybinioj 110 mietraŭ pad domam. Da asabniaka prykładajecca 0,21 ha ziamli. Patencyjnych kupcoŭ zaachvočvajuć «panaramnym vidam na Minsk», nie ŭdakładniajučy, što nazirać daviadziecca za čałaviečym murašnikam Kamiennaj Horki.
2. $2,235 miljona — za vitańnie z 1990-ch
Letaś hety katedž u Kałodziščach (10 km ad Minska) pradavali za $2,6 miljona, ale niaŭdała. Ciapier dom ucanili na $365 tysiač— dobraja źnižka. Budynak vysačezny, u im čatyry ŭzroŭni ahulnaj płoščaj 937 m2.
«Piać spalniaŭ, piać sanvuzłoŭ, łaźnia, basiejn, dva haražy», — raschvalvajuć dom pradaŭcy. Samaje zapaminalnaje ŭ katedžy— biaskoncy załacisty koler, svojeasablivaje pryvitańnie z 1990-ch. Padobnyja interjery ź bieźličču statuetak, karcin na ścienach i kavanych upryhožvańniaŭ padabalisia čynoŭnikam z akružeńnia biehłaha ŭkrainskaha prezidenta Viktara Janukoviča.
3. $2,1 miljona — za dom na dźvie siamji ŭ Drazdach
Katedž u samym darahim rajonie Minska možna kuplać u składčynu, na dźvie siamji. Dźvie simietryčnyja pałovy doma (pa 334 m2 kožnaja) abjadnanyja basiejnam na cokalnym paviersie. Adna ź ich užo hatovaja dla pražyvańnia, druhaja azdablajecca. Pad domam usiaho 7 sotak ziamli, učastki pad hetym i susiednimi katedžami na vulicy Pijanierskaj pradavalisia praz aŭkcyjon.
4. $2,1 miljona — za «pravilnuju płaniroŭku»
«Dom dla ludziej z paniaćciem i hustam», — zapeŭnivajuć pradaŭcy i kateharyčna dadajuć, što ŭ katedžy płoščaj 430 m2 «pravilnaja płaniroŭka».
Try spalni, dva haražy, łaźnia, terasa, ciopłaja padłoha — zvyčajny nabor dla elitnaha katedža, ale blizkaść da vady dazvalaje prasić za dom našmat bolšyja hrošy. Vulica Pastaŭskaja ŭ Minsku znachodzicca kala Cnianskaha vadaschovišča.
5. $1,99 miljona — za šklanuju siadzibu ŭ lesie
Samaja darahaja nieruchomaść na addaleńni ad Minska schavałasia ŭ vilejskich lasach, kala vioski Budźki. Asnoŭny dom maje kala 200 m2 ahulnaj płoščy i pabudavany sa škła z azdableńniem drevam. Dla haściej prapanujecca całkam draŭlanaja chatka płoščaj 80 m2 ź dźviuma spalniami i kaminam.
U dadatak — dom dla achovy i tenisny kort. Na bierazie štučnaha voziera pabudavanaja spa-zona. Tut znachodziacca dźvie saŭny, a taksama džakuzi. Ale hałoŭnaje — hihanckija abšary ziamli, ažno 250 sotak u lesie.
