Rasijski vajenny historyk pa punktach raśpisaŭ viersii krušeńnia «Boinha»
Rasijski vajenny historyk Mark Sałonin, viadomy svaimi pracami na temu Vialikaj Ajčynnaj vajny, napisaŭ pra krušeńnie «Boinha». Na dumku Sałonina, nijakaj pryncypova novaj infarmacyi, akramia ŭžo najaŭnaj, u bližejšy čas atrymana nie budzie, navat z čornych skryń.
1. Palityčnyja rašeńni buduć pryniatyja na padstavie toj infarmacyi, jakaja ŭžo viadomaja da hetaha času. Ničoha pryncypova novaha, što jakasna źmianiaje karcinu padziej, znojdziena nie budzie. Nie bojciesia i nie spadziavajciesia.
2. Toje, što patrapiła ŭ momant katastrofy ŭ pole zroku amierykanskich spadarožnikaŭ, užo vyvučana. Ničoha novaha nie źjavicca; «adkrucić» možna na videapłejery, ale nie ŭ žyćci. Vyvučeńnie «čornych skryń» (navat kali Maskva addaść ich mižnarodnaj kamisii, u što vierycca ź vialikaj ciažkaściu) ničoha pryncypova novaha nie dadaść: samalot lacieŭ-lacieŭ, usio było narmalna, a potym ničoha nie stała. Navat kali na samapiscy zachavaŭsia zapis: «rakieta źleva (abo sprava)», to i heta mała čym dapamoža ŭ vysnačeńni dakładnych miescaŭ startu zienitnaj rakiety. Ničoha istotnaha nie daść i vyvučeńnie dzirak u abłomkach samalota: uzryvalnik na zienitnaj kiravanaj rakiecie (ZKR) niekantaktny, padryŭ bajavoj častki rakiety moh adbycca ŭ lubym punkcie vakoł samalota.
Navat kali na ziamli budzie znojdzieny i pieradadzieny mižnarodnaj kamisii šyldzik ź sieryjnym zavadskim numaram rakiety, to i heta ničoha nie źmienić.
I ŭkrainskaja, i rasijskaja armija paŭstali jak pradukty raspadu armii savieckaj; pry tym žachlivym bardaku, jaki adbyvaŭsia na pačatku 90-ch hadoŭ, dakładna adsačyć za pieramiaščeńniem rakiety na nieabsiažnych prastorach krain SND nie ŭdasca. Narešcie, nie zabyvajcie, što «krymnaš», i ŭ hetym Krymie byli zachoplenyja zienitnyja častki SPA Ukrainy; pry hetym ciahnuć z Kryma ŭ Danbas 35-tonnuju puskavuju ŭstanoŭku zusim nie abaviazkova, dosyć u kuzavie luboha lohkaha hruzavika pieravieźci bojekamplekt z 4-ch «ukrainskich» rakiet.
Nijakaj stabilnaj «linii frontu» na Danbasie niama.
Paniaćcie «kantralujemaja terytoryja» tam vielmi ŭmoŭnaje, tyja atačajuć hetych, hetyja atačajuć tych… Tak što navat kali amierykancy i zmohuć «vycisnuć» z dadzienych spadarožnikavaj raźviedki miesca startu rakiety z dakładnaściu plus-minus kiłamietr, to dla adnaznačnaha adkazu na pytańnie «chto stralaŭ?» hetaha mała — kali tolki punkt strełu nie apyniecca ŭ centry Daniecka abo Słavianska (ale takoha, viadoma ž, nie budzie).
3. Nie spadziajučysia na cudoŭnaje źjaŭleńnie novaj značnaj infarmacyi i adkidajučy ekstravahantnyja viersii (nakštałt šaravoj małanki ci vybuchu na borcie małazijskaha samalota zakładzienaj nieviadomymi terarystami bomby), my pavinny abmiežavać uvieś nabor varyjantaŭ tym, što samalot byŭ źbity zienitnaj rakietaj ź ziamli. Mienavita na heta pakazvajuć i dadzienyja spadarožnikavaj vyviedki (zafiksavana praca RŁS naviadzieńnia rakiety i ŭspyška vybuchu na trajektoryi palotu «Boinha»), i śviedčańni šmatlikich vidavočcaŭ, i najaŭnyja fotadakumienty, i šmatlikija zajavy, zroblenyja lidarami «sieparatystaŭ» i pieradadzienyja ŭ ŚMI ŭ pieršyja hadziny paśla trahiedyi. Adna ź lepšych padborak hetych śviedčańniaŭ — tut: http://p-senko.livejournal.com/16616.html
4. Uvieś nabor abstavinaŭ, pry jakich zienitnaja rakieta mahła patrapić u hramadzianski samalot, moža być źviedzieny da troch varyjantaŭ:
a) niesankcyjanavany (vypadkovy) zapusk
b) zapusk z metaj źniščeńnia samalota, jaki byŭ pamyłkova identyfikavany jak varožy vajenny
v) zapusk z metaj źniščeńnia samalota, identyfikavanaha jak pasažyrski, z namieram pierakłaści ŭ dalejšym adkaznaść za heta złačynstva na praciŭnika.
Čaćviorty varyjant nielha prydumać navat abstraktna
5. Vypadkovy zapusk rakiety i toje, što jana patrapiła ŭ vyšynnuju cel, mahčymyja — ale vierahodnaść takoj padziei nikčemna małaja. Zienitna-rakietny kompleks siaredniaj dalokaści — heta składanaja sistema, jakaja patrabuje ŭzhodnienych paśladoŭnych dziejańniaŭ bajavoha raźliku; zapuścić rakietu botam, jaki ŭpaŭ na pult kiravańnia, nie atrymajecca. Tut jašče treba mieć na ŭvazie, što ŭ ZRK «Buk» vykarystoŭvajecca napałovu aktyŭnaja radyjołakacyjnaja sistema naviadzieńnia; praktyčna heta aznačaje, što kab rakieta patrapiła ŭ metu patrabujecca bieśpierapynnaje (abo impulsna-pieryjadyčnaje) apramieńvańnie («padśviatleńnie») mety naziemnym radyjołakataram až da momantu sustrečy rakiety z samalotam (pry nachilnaj dalokaści ŭ 15—20 km hetaha momantu treba čakać kala 20 siekund). Takim čynam, navat u vypadku nastolki nievierahodnaj padziei, jak niesankcyjanavany schod rakiety z vyznačanaj trajektoryi, bajavomu raźliku dastatkova prosta vyklučyć łakatar, i pierachop budzie sarvany.
6. Jašče mienš vierahodnym varyjantam ujaŭlajecca pravakacyja z namieram abvinavacić u złačynstvie sapiernika (varyjant «v»). Mahčymaść dasiahnieńnia «karysnaha» (z punktu hledžańnia pravakatara) efiektu tut vielmi sumnieŭnaja. Čamu? Hladzi p.2. Kančatkova i biespavarotna ničoha dakazać nie atrymajecca — praciŭniki ŭzbrojenyja adnolkavaj zbrojaj i vajujuć bieź vidavočna praviedzienaj linii frontu. Paŭstanie tolki biaskoncaja płynia ŭzajemnych abvinavačvańniaŭ (što my i bačym siońnia ŭ realnaści). Naŭmysna zabić try sotni niavinnych duš u metach iłžyvaha abvinavačvańnia praciŭnika — da takoha nie dajšli navat Hitler sa Stalinym. Vykryty pravakatar (a siońnia, u epochu vysokich infarmacyjnych technałohij, usio tajemnaje chutka stanovicca vidavočnym) stanie absalutnym izhojem, u adnosinach da jakoha lubyja ekanamičnyja sankcyi buduć rascenienyja jak niedastatkovyja.
U kožnym vypadku, niaŭchilnaj umovaj pośpiechu pravakacyi pavinna stać padzieńnie abłomkaŭ samalota i «čornych skryń» na nadziejna (!) kantralavanaj pravakataram terytoryi. H.zn. kali b heta rabiŭ ukrainski bok, to źbivać treba było pasažyrski samalot, jaki lacić z uschodu na zachad, uhłyb Ukrainy, ale ŭžo nijak nie naadvarot!
7. Samym (a kali bieź lišnich ekivokaŭ, to i adzinym) praŭdapadobnym źjaŭlajecca varyjant «b». Pasažyrski samalot źbili pamyłkova, bo dumali, što źbivajuć varožy transpartnik. Technična małavierahodny (dla napałovu aktyŭnaj sistemy z žyvym čałaviekam la pulta kiravańnia), ale ŭ pryncypie mahčymy padvaryjant — navodzili na adzin samalot, a patrapili ŭ druhi. Hetaja viersija całkam paćviardžajecca tym patokam radasnych paviedamleńniaŭ «sieparatystaŭ» pra čarhovy źbity ŭkrainski An-26, jaki ŭvarvaŭsia ŭviečary 17 červienia ŭ internet-prastoru, a potym byŭ pradublavany ahienctvami RIA-Novosti i Łajf-Ńjus. Hetaja viersija vyrazna kareluje z realnymi faktami źniščeńnia sistemaj SPA «sieparatystaŭ» troch ukrainskich samalotaŭ (An-26, Ił-76, Su-25) i z paŭtuzina viertalotaŭ.
Usio vielmi prosta. Natoŭpy kramloŭskich «anuč», zachłynajučysia ŭ pienie i kryku, admaŭlajuć hetuju prostuju i zrazumiełuju viersiju tolki tamu, što źbić samalot pamyłkova mahli vyklučna tolki «sieparatysty». Ukrainski bok nijak nie moh by pryniać za «varožy» samalot, jaki pralacieŭ z zachadu na ŭschod pa viadomym kalidory pasažyrskich palotaŭ, z usimi nieabchodnymi sihnałami apaznavańnia, nikomu ničoha drennaha nie zrabiŭ i praź niekalki chvilin pavinien byŭ syści ŭ pavietranuju prastoru susiedniaj krainy.
8. Reputacyjnyja straty Rasija mahła by źnizić amal da nula. Dla hetaha ŭ tuju ž chvilinu, kali na terytoryju Danbasa byli adpraŭlenyja zienitnyja puskavyja ŭstanoŭki «Buk», varta było apaviaścić ICAO pra toje, što paloty hramadzianskaj avijacyi nad terytoryjaj uschodu Ukrainy pavinny być spynienyja. Navošta, kamu i dla čaho Rasija pieradaje zienitnaje ŭzbrajeńnie — heta nie toje pytańnie, jakoje možna i treba abmiarkoŭvać z ICAO. «My tak vyrašyli» — całkam dastatkovaje tłumačeńnie.
Na žal, u dziejańniach Maskvy ŭziali vierch maniery pasrednaj dvarovaj špany: ciškom, z-za vuhła, z namieram syści ŭ «hłuchuju niesaznanku» u dalejšym.
Reputacyjnyja straty Rasii — niepaźbiežnyja i ciažkija paśla hibieli trochsot niavinnych ludziej — možna było b istotna źnizić, kali b aficyjnaja Maskva adrazu i ćviorda admoviłasia ad chłuśni. «Tak, samalot źbity našaj rakietaj. Adbyłasia trahičnaja pamyłka. Vinavatyja paniasuć samaje strohaje pakarańnie. Siemjam achviaraŭ katastrofy budzie akazana ŭsia mahčymaja materyjalnaja i psichałahičnaja dapamoha. Samaloty MNS hatovyja da vyletu da miesca krušeńnia samalota». I ŭsio. I mižnarodny rezanans byŭ by zusim inšym.
Možna było b ździejśnić «manieŭr uchileńnia» i pieravalić ŭsiu vinu na «apałčencaŭ», jakija nibyta zachapili spraŭny ZRK ukrainskaj armii i sami znajšli śpiecyjalistaŭ, jakija ŭmiejuć im kiravać. Tak, u takoj viersii ŭsio vielmi zybka.
Ciažka pavieryć, što ŭkrainskija vajennyja, kali jany ŭžo byli zmušanyja pakinuć «Buk» pry adstupleńni, palenavalisia ŭdaryć kuvałdaj pa panieli kiravańnia abo strelić paru razoŭ z PM ŭhłyb elektronnaha načyńnia.
A hetaha ŭžo dastatkova dla taho, što vykinuć kompleks było praściej za toje, jak ramantavać jaho ŭ palavych umovach. Ni dla kaho nie sakret, što t.zv. «apałčencami» kamandujuć hramadzianie RF Hirkin i Baradaj, dy i ŭsia hetaja «Navarosija» prydumanaja i arhanizavanaja viadoma dzie i kim. I tym nie mienš, navat u hetaj viersii niepasrednaja vina rasijskich uładaŭ za źniščany cyvilny samalot mahła b być razmytaj.
Na žal. Kačka i płavaje jak kačka, i lataje, i chodzić, i krakaje jak kačka. Tyja, chto zdahadaŭsia raspalić na terytoryi susiedniaj brackaj krainy pažar biazhłuzdaha «chalernaha buntu», apynulisia niazdolnymi navat da abarony svaich ułasnych intaresaŭ.
U vyniku reputacyjnych strat Rasija ruchajecca da krajniaha maksimumu ŭ situacyi, kali trahičnaja pamyłka (a z kim na vajnie takoha nie byvała?) pačynaje razrastacca ŭ naŭmysnuju kampaniju chłuśni, paklopu, falsifikacyi dokazaŭ, cisku na mižnarodnych ekśpiertaŭ.
Kaho Boh zachoča pakarać — pazbaŭlaje rozumu.
