Украіна папярэдзіла жыхароў акупаваных Расіяй тэрыторый пра крымінальную адказнасць за ўдзел у «рэферэндумах»
Украінцам пагражае да 12 гадоў пазбаўлення волі за ўдзел у «рэферэндумах» аб аб'яднанні з Расіяй на акупаваных ёю тэрыторыях. «Калі будзе даказанае калабаранцтва, або, да прыкладу, удзел у рэферэндуме, або падахвочванне да ўдзелу ў рэферэндуме, то людзі могуць атрымаць да 12 гадоў з канфіскацыяй», — заявіла віцэ-прэм'ерка Ірына Верашчук.
Ірына Верашчук
Пры гэтым яна заклікала украінцаў эвакуявацца з акупаваных тэрыторый. Верашчук таксама адзначыла, што калі эвакуявацца немагчыма, то лепш не ўдзельнічаць у «галасаванні ні пад якім ціскам, ніякім гвалтоўным прымусам».
Верашчук упэўненая, што на «рэферэндумы», калі яны адбудуцца, у акупаваных Херсонскай і частцы Запарожскай абласцей прыйдзе менш за 2% жыхароў, якія там засталіся.
Расійскія вайскоўцы цяпер кантралююць частку Запарожскай вобласці Украіны, у тым ліку гарады Мелітопаль і Энергадар, а таксама Херсонскую вобласць, Луганскую вобласць і большую частку Данецкай. У акупацыйных «вайскова-грамадзянскіх адміністрацыях» заявілі пра планы неўзабаве правесці рэферэндумы аб далучэнні да Расіі.
