«Слуцкай каровай» забіты ўвесь Дагестан. А ў Слуцку яна ніколі не была
Слуцкі сыраробны камбінат у сваім афіцыйным акаўнце ў Instagram паведаміў, што масла пад ягонай маркай актыўна прадаецца ў Расіі. Але сам ён да гэтага прадукта ніякага дачынення не мае, піша kurjer.info.
У пасце камбіната паведамляецца, што прадпрыемства выпускае масла пад гандлёвай маркай «Ясь Сыродел» 72,5% і 82,5% масай 20 кг, 180 г, 160 г.
Слуцкі сыраробны камбінат не мае афіцыйных дыстрыб'ютараў на тэрыторыі Расіі і не мае дачынення да масла «Слуцкая корова», «Ваминка», «Слуцкая буренка», якія выдаюцца за слуцкія.
У каментарах да паста людзі скардзіліся, што «ўвесь Дагестан запоўнены гэтым фальсіфікатам», наракалі, што фальсіфікатам труцяцца дзеці і выказвалі здагадку, што гэты прадукт фактычна робяць з маргарыну.
На ўпакоўках падробленых тавараў, якія прадаюцца далёка ад Беларусі, перадусім на поўдні Расіі, пазначаюцца сапраўдныя рэквізіты слуцкага прадпрыемства.
Беларуская прадукцыя мае ў Расіі імідж вельмі якаснай, таму яе нярэдка падрабляюць. Гэта толькі адзін са шматлікіх выпадкаў.
