Літва ўнесла ў спіс «неўязных» Наташу Каралёву і Хабіба
Літва ўнесла ў спіс неўязных асоб расійскіх выканаўцаў Наташу Каралёву і Хабіба Шарыпава праз канцэрты ў Крыме. Яны не змогуць наведваць краіну да 21 студзеня 2027 года.
Наташа Каралёва, фота ТАСС
Канцэрт Шарыпава (Хабіба), які павінен быў адбыцца ў Вільні ў нядзелю ўвечары, адменены. Спявак даведаўся пра гэта ўжо ў дарозе — ён прайшоў пашпартны кантроль, але ў самалёт яго не пусцілі, распавёў Шарыпаў у сваім інстаграме, піша РБК.
Пазней ён пацвердзіў адмену канцэрта, адзначыўшы, што ў яго быў дазвол ад Міністэрства культуры Літвы і віза на ўезд.
Прадстаўнік арганізатараў канцэрта паведаміў, што аргументам забароны на ўезд для спевака стаў канцэрт для дзяцей у Севастопалі.
Па даных LRT, на мінулым тыдні з нагоды правядзення канцэртаў Каралёвай і Хабіба ў Міністэрства замежных спраў звярнуліся старшыня парламенцкага камітэта па нацыянальнай бяспецы і абароне Лаўрынас Кашчунас і яго калега.
Канцэртны дырэктар Наташы Каралёвай Марына Нарынская паведаміла РБК, што канцэртаў у Крыме ў спявачкі не было. Сама Каралёва заявіла РБК, што гэтая пастанова выклікае толькі адну рэакцыю «ўсмешку з горыччу і здзіўленнем».
«Міжволі адчуваеш гішпанскі сорам за такіх прадстаўнікоў улады, якія, прапагандуючы «свабоду», патрабуюць ацэнкі геапалітычнай абстаноўкі. Божа, Наташа Каралёва і геапалітыка», — заявіла спявачка.
Улады Літвы не ў першы раз уводзяць забароны на ўезд у краіну для выканаўцаў з Расіі. У 2016 годзе ў спіс «неўязных» у Літву быў уключаны Алег Газманаў, у 2019 — Грыгорый Лепс, а ў мінулым годзе ўезд на бліжэйшыя пяць гадоў за пазіцыю па далучэнні Крыма забаранілі Філіпу Кіркораву.
