У Вілейцы сярод прышчэпленых ад кавіду разыграюць падарункі
Каб матываваць людзей зрабіць прышчэпку ад каранавіруса, у Вілейцы вырашылі правесці конкурс з уручэннем прызоў. Удзельнікамі яго могуць стаць толькі тыя пацыенты, якія атрымліваюць першую дозу вакцыны, паведамляе mlyn.by.
Акцыя стартуе 25 лістапада і працягнецца тры дні, паведаміла галоўны доктар Вілейскай ЦРБ Ірына Макарава. Спонсарамі стануць раённае аб'яднанне прафсаюзаў і прафсаюз ЦРБ. Прышчапіцца можна расійскай і кітайскай вакцынамl.
Зрабіць прышчэпку можна дома праз заяўку ў кол-цэнтр, у стацыянарных пунктах (іх у горадзе два — будынак Палаца культуры і «Сатурн»), у працэдурным кабінеце паліклінікі і па месцы работы. Кожнаму пацыенту будзе прысвоены пэўны нумар, незалежна ад таго, дзе ён прышчапіўся.
Вынікі акцыі падвядуць 29 лістапада і разыграюць пяць прызоў, уключаючы памятныя падарункі і касметалагічны курс.
У Вілейскім раёне на канец лістапада ад каранавіруса прышчапілася 33,7% насельніцтва.
