ЕС выдзеліць €3,5 млн на вяртанне мігрантаў з Беларусі ў свае краіны
ЕС выдзеліць €3,5 млн на тое, каб падтрымаць добраахвотнае вяртанне мігрантаў з Беларусі ў свае краіны. Пра гэта заявіла ў аўторак кіраўніца Еўракамісіі Урсула фон дэр Ляен, паведамляе ТАСС.
«Усё больш мігрантаў аказваюцца ў пастцы, і мы будзем супрацоўнічаць з агенцтвамі ААН, каб палегчыць іх вяртанне дадому. Мы мабілізуем да €3,5 млн для падтрымкі добраахвотнага вяртання з Беларусі», — паведаміла яна.
Міграцыйны крызіс на мяжы Беларусі з Латвіяй, Літвой і Польшчай, куды з пачатку года накіраваліся мігранты, рэзка абвастрыўся 8 лістапада. Некалькі тысяч чалавек падышлі з беларускага боку да польскай мяжы і не пакідалі памежную зону, некаторыя з іх паспрабавалі трапіць на тэрыторыю Польшчы, зламаўшы загароду з калючага дроту.
Краіны ЕС абвінавачваюць Мінск у наўмыснай эскалацыі крызісу.
