Нямеччына не прызнае Лукашэнку, але лічыць патрэбнымі перамовы з ім для аказання дапамогі мігрантам
Урад Нямеччыны не прызнае легітымнасць Аляксандра Лукашэнкі як прэзідэнта Беларусі, але лічыць патрэбнымі перамовы з ім для аказання гуманітарнай дапамогі мігрантам. Пра гэта заявіў у сераду на брыфінгу афіцыйны прадстаўнік кабінета міністраў Штэфен Зайберт, піша ТАСС.
«Для таго, каб палепшыць гэтую гуманітарную сітуацыю для тысяч людзей, мае сэнс размаўляць з тымі, хто ў Мінску мае магчымасць змяніць становішча, нават калі гаворка ідзе пра кіраўніка, легітымнасьць якога Нямеччына і астатнія еўрапейскія краіны не прызнаюць», - сказаў ён.
«Таму канцлер правяла тэлефонную размову з Лукашэнкам — каб знайсці гуманітарныя шляхі, каб забяспечыць, напрыклад, доступ для УВКБ (Упраўленне Вярхоўнага камісара ААН па справах бежанцаў)», - падкрэсліў Зайберт, адзначыўшы, што мігранты пачалі атрымліваць першую дапамогу на месцы.
«І яна правяла гэтую размову ў цеснай каардынацыі з Еўракамісіяй і пасля папярэдняй інфармацыі з боку важных партнёраў у рэгіёне», - сказаў Зайберт.
