Мінздароўя ўсё ж рэкамендуе хадзіць у масках, але штрафаваць не будуць

У тэлеграм-канале ведамства з'явілася тлумачэнне пастановы Міністэрства аховы здароўя ад 20 кастрычніка.

Тлумачэнні напісаныя складана. Вось гэта, напрыклад, адзін сказ удакладнення:

«Гаворка ідзе аб прымяненні кіраўнікамі арганізацый неабходных мер па забеспячэнні кантролю за выкарыстаннем сродкаў абароны органаў дыхання работнікамі, фізічнымі асобамі пры наведванні аб'ектаў і арганізацый пры адсутнасці магчымасці захавання сацыяльнай дыстанцыі (1-1, 5 метра), а таксама неабходнасці распрацоўкі бальнічнымі арганізацыямі аховы здароўя планаў арганізацыі працы ў рэжыме, які забяспечвае захаванне ўмоў інфекцыйнага стацыянара, і схем занавання ў амбулаторна-паліклінічных і бальнічных арганізацыях з захаваннем лагістыкі перамяшчэння пацыентаў і работнікаў».

Але галоўнае ў тым, што адменена адміністрацыйная адказнасць да фізічных асоб за невыкарыстанне сродкаў абароны органаў дыхання (маскі) на аб'ектах усіх формаў уласнасці і ў грамадскім транспарце.

Але разам з тым, ва ўмовах эпідэміялагічнай сітуацыі, Міністэрства аховы здароўя рэкамендуе грамадзянам выкарыстоўваць сродкі абароны органаў дыхання пры наведванні аб'ектаў і арганізацый, паведамляецца ў тэлеграм-канале.