Лукашэнка падарыў Зюганаву ордэн на юбілей
20 чэрвеня Лукашэнка падпісаў указ аб узнагароджанні нязменнага цягам больш за 30 гадоў лідара расійскіх камуністаў Генадзя Зюганава ордэнам Пашаны.
Генадзь Зюганаў ускладае кветкі да магілы Іосіфа Сталіна. Фота: AP Photo/Alexander Zemlianichenko
Ушанавалі Зюганава «за значны асабісты ўклад у развіццё ўсебаковага супрацоўніцтва паміж Беларуссю і Расіяй, саюзнага будаўніцтва, умацаванне дружалюбных адносін і адзінства народаў дзвюх краін».
26 чэрвеня лідару расійскіх камуністаў споўніцца 80 гадоў, і гэтае ягонае ўшанаванне відавочна з'яўляецца падарункам да юбілею.
Генадзь Зюганаў належыць да ліку тых расійскіх палітыкаў, з якімі Лукашэнка мае справу з самага пачатку свайго прыходу да ўлады ў Беларусі. Ён узначаліў Камуністычную партыю Расійскай Федэрацыі 14 лютага 1993 года, адразу пасля таго, як яе дазволілі ў постсавецкай Расіі афіцыйна аднавіць. З таго часу лідары гэтай палітычнай сілы не мяняліся.
Зорны час Зюганава прыпаў на 1990-я, калі на прэзідэнцкіх выбарах 1996 года ён быў галоўным канкурэнтам Барыса Ельцына і не дапусціць яго да ўлады ўдалося толькі праз хітра арганізаваную перадвыбарчую кампанію, у якой хапала маніпуляцый і прамых злоўжыванняў. Пасля таго КПРФ разам з яе лідарам, захоўваючы ролю асноўнай фармальна апазіцыйнай сілы ў Расіі, па-сур'ёзнаму на ўладу больш не прэтэндавалі, пагадзіўшыся стаць часткай пуцінскай палітычнай сістэмы.
Чытайце таксама:
«Адлупцаваць — гэта мы лёгка». Пуцін абмеркаваў з Зюганавым цялесныя пакаранні
У Мінску праходзіць «антыфашысцкі» камуністычны форум. На яго прыехаў Зюганаў
Зюганаў абурыўся, што Байдэна, «які спатыкаецца», паказваюць па ТБ часта, а пра Брэжнева маўчаць
