Лукашэнка расказаў, што Маркава ўгаворвалі быць міністрам інфармацыі
Прызначаючы Марата Маркава міністрам інфармацыі, Лукашэнка пацікавіўся, што яго падштурхнула да таго, каб пераходзіць з нібыта журналісцкай на чыста чыноўную пасаду. Маўляў, ці не аказвалася на яго ціску пры прыняцці рашэння. Адказ даваў першы намеснік кіраўніка адміністрацыі Лукашэнкі Максім Рыжанкоў.
Марат Маркаў слухае павучанні Лукашэнкі. Скрыншот з відэа
Рыжанкоў адказаў Лукашэнку, што, маўляў, Маркава выбраў сам час. На пытанне ж, ці пыталіся згоды самога выбранага часам, Рыжанкоў сказаў, што
«мы з ім праводзілі сумоўе, дастаткова шчырыя і адкрытыя размовы і ў мяне асабіста, і ва Уладзіміра Барысавіча [Пярцова]. Гэта рашэнне не аднаго дня, быў час і падумаць. На сёння больш аўтарытэтнага чалавека ў інфармацыйным асяроддзі [няма], гэта найлепшы кандыдат на сённяшні момант. Час такі, што найлепшы павінен кіраваць інфармацыйнай [сферай]».
Лукашэнка тады спытаў у Маркава, сам ён прыняў рашэнне, ці яго «падціснулі». І нават зычліва прапанаваў новапрызначанаму чыноўніку, які імгненна падхапіўся з крэсла, «прысаджвацца».
Сеўшы назад, той сказаў, што час цяпер сапраўды дастаткова сур'ёзны, а праца на тэлеканале АНТ, які ён раней узначальваў, маўляў, выбудаваная. Таму можна ісці і ў чыноўнікі.
На пытанне ж Лукашэнкі, хто ж цяпер там будзе браць інтэрв'ю ў «самых сур'ёзных людзей», Маркаў выказаў гатоўнасць працягваць гэта рабіць і ў міністэрскім статусе, бо, маўляў, такія прэцэдэнты ў гісторыі былі.
Лукашэнка падкрэсліў, што праца міністра будзе для Маркава асноўнай, але ён будзе, маўляў, толькі рады, калі чыноўнік з ёй будзе спраўляцца і ў яго застануцца яшчэ час і сілы на асабістыя здзяйсненні на прапагандысцкім фронце.
Чытайце таксама:
Рускамірная мастачка Жыгімонт абурылася з нагоды прызначэння Маркава
Лукашэнка расказаў, што пад выбары выдаткаваў на прапагандыстаў «немалыя грошы»
