Тэракт у «Крокус Сіці Хол»: што вядома на гэты момант
Трагедыя ў канцэртнай зале «Крокус Сіці Хол», што ў падмаскоўным Краснагорску, разыгралася ўвечары 22 сакавіка.
Фота: AP Photo/Dmitry Serebryakov
У той вечар у зале павінен быў адбыцца канцэрт расійскага гурта «Пікнік», і на ім збіраліся прысутнічаць тысячы людзей. Амаль усе білеты былі выкупленыя, а гэта каля 6200 чалавек.
Але перад пачаткам канцэрта ў будынак уварваліся ўзброеныя людзі ў камуфляжы, якіх было не менш за пяць. Яны адкрылі страляніну спачатку па ахоўніках будынка, а пасля і па гледачах.
Спачатку паведамлялі пра як мінімум 12 загінулых і 35 параненых, але пасля лічба ўзрасла адпаведна да 40 і 100 і яна відавочна не канчатковая.
Музыкі гурта «Пікнік», як паведамляецца, не пацярпелі.
Пасля страляніны ў будынку «Крокус Сіці Хол» прагучаў выбух і пачаўся пажар. Пасля быў зафіксаваны яшчэ адзін выбух.
Да будынка «Крокус Сіці Хол» былі накіраваныя паднятыя па трывозе супрацоўнікі маскоўскіх САХР і АМАП. Прыехалі і пажарнікі, але яны не адразу пачалі выратавальныя работы з-за таго, што ў будынку па-ранейшаму знаходзіліся тэрарысты.
Пасля таго, як выратавальная аперацыя пачалася, пажарнікі вывелі з падвала будынка каля 100 чалавек, але гэта былі не ўсе, хто ў ім знаходзіўся. Паводле словаў губернатара Маскоўскай вобласці, шпіталізавалі 21 чалавека, з іх чацвёра ў цяжкім стане.
Пажар у «Крокус Сіці Холе» не могуць патушыць дагэтуль, яго плошча — 13000 квадратных метраў. Агонь ахапіў фасад будынка і ўжо перакінуўся на іншы корпус.
Расійскія пажарнікі не могуць патушыць узгаранне, бо яго ачаг знаходзіцца занадта далёка і ім не хапае даўжыні водных шлангаў. Падтрымку ратавальнікам аказваюць верталёты, набіраючы ваду з найбліжэйшых вадаёмаў.
Паведамляецца, што чатыром тэрарыстам нібыта ўдалося пакінуць месца атакі, але расійскія сілавікі затрымалі невядомага мужчыну з бэйджам.
Таксама ідэнтыфікавалі аўтамабіль, на якім нібыта прыехалі тэрарысты. Мяркуецца, што ён можа стаяць на паркоўцы замініраваным. Яго ачапілі.
Усе выезды з Масквы перакрытыя, у маскоўскім метро пачаліся ўзмоцненыя догляды пасажыраў. Гэта сведчанне таго, што тэрарысты маглі паспець з'ехаць з месца падзей.
Маскоўскія аэрапорты ўзмацнілі меры бяспекі.
У Маскве і ў Падмаскоўі пасля тэракта адмянілі ўсе забаўляльныя мерапрыемствы, запланаваныя на выхадныя. Тое ж самае робяць і ў іншых рэгіёнах.
З'яўляюцца паведамленні, што перад нападам на ўваходзе ў «Крокус Сіці Хол» не працавалі рамкі металадэтэктараў, а ахова не правярала сумкі ў людзей.
Прадстаўнік Белага дома Джон Кірбі заявіў, што ў Вашынгтоне атрымліваюць паведамленні аб тым, што здарылася ў Маскве. «Кадры адтуль жахлівыя і іх цяжка глядзець, — заявіў ён. Нашы думкі з тымі, чые блізкія загінулі ў выніку гэтага жудаснага нападу».
Таксама Кірбі заявіў, што ў Белага дома няма даных аб датычнасці Украіны да тэракту ў «Крокусе». Ён таксама падкрэсліў, што Вашынгтон загадзя не меў інфармацыі аб тэракце ў Маскве.
Прадстаўнік Галоўнага ўпраўлення разведкі Мінабароны Украіны Андрэй Юсаў заявіў з нагоды тэракта:
«Гэта свядомая правакацыя спецслужбаў Пуціна, пра якую папярэджвала міжнародная супольнасць. Крамлёўскі тыран з гэтага пачынаў сваю кар'еру і такімі ж злачынствамі супраць уласных грамадзян хоча яе завяршыць».
Пра недатычнасць Украіны да гэтага тэракта заявіў дарадца кіраўніка Офіса прэзідэнта Украіны Міхаіл Падаляк, а таксама прадстаўнік Рускага добраахвотніцкага корпуса.
Былы прэзідэнт Расіі Дзмітрый Мядзведзеў адрэагаваў на тэракт у Маскве гнеўным допісам з пагрозамі Украіне
«Тэрарысты разумеюць толькі тэрор у адказ. Ніякія суды і расследаванні не дапамогуць, калі сіле не супрацьпаставіць сілу, а смерцям — татальнае пакаранне смерцю тэрарыстаў і рэпрэсіі супраць іх сем'яў. Сусветны вопыт.
Калі будзе вызначана, што гэта тэрарысты кіеўскага рэжыму, паступаць з імі і іх ідэйнымі натхняльнікамі інакш — немагчыма. Усе яны павінны быць знойдзеныя і бязлітасна знішчаны як тэрарысты. Уключаючы афіцыйных асоб дзяржавы, якая здзейсніў такое злачынства. Смерць за смерць».
Чытайце таксама:
«Гэта правакацыя спецслужбаў Пуціна» — ГУР Украіны пра страляніну ў Падмаскоўі
