Знайсці
12.02.2024 / 15:42РусŁacБел

Хто робіць беларускіх падлеткаў сусветнымі зоркамі. Беларускі музычны лэйбл, пра які вы маглі не чуць

Пра музычны лэйбл Goost Music і яго стваральнікаў распавядаецца ў новым выпуску ютуб-канала «Міністэрства сепультуры». У выканаўцаў, якіх ён раскручвае, мільёны праслухоўванняў на розных платформах і сусветная папулярнасць.

Скрын старонкі сайта Goost Music 

Міжнародным поспехам карыстаюцца беларускія стваральнікі музыкі ў стылі фонк — паджанру хіп-хопа, які нарадзіўся ў ЗША ў 1990-я гады. Найбольш гэтая музыка была прадстаўлена на платформе SoundCloud. Паступова яна выйшла на першыя месцы па папулярнасці.

Сярод самых папулярных беларускіх выканаўцаў у Spotify ёсць некалькі фонк-праектаў — OBLXKQ, Nikitata, Romantica.

У раскрутцы ім дапамагае музычны лэйбл Goost Music, які стварылі беларусы. Па апошняй статыстыцы Spotify ОBLXKQ абышоў па праслухоўваннях нават Макса Каржа.

Першы сузаснавальнік лэйбла — Зміцер Мікуліч. Некалі ён граў у метал-групе «Стая», прадзюсарам якой быў Пётр Ялфімаў, пазней працаваў у IT-кампаніі Gismart.

Другі сузаснавальнік лэйбла — Уладзімір Развадоўскі. Родам ён з Ваўкавыска. Вучыўся ў музычнай школе, дзе граў на цымбалах. Скончыў геафак БДУ. Пачынаў музычную карʼеру ў гурце «Праспект», граў у «Без білета».

Зміцер Мікуліч (крайні злева) і Уладзімір Развадоўскі (крайні справа). Фота: сайт Goost Music

Пра стварэнне лэйбла Мікуліч распавядаў у інтэрвʼю MUSIC TIMES: «Гісторыя пачалася, калі я запрасіў Вову ў адзін са сваіх гуртоў, якія я прадзюсаваў і запісваў да таго, як адкрыў лэйбл. Вова надзвычайны музыка, ён граў са шматлікімі вядомымі гуртамі, і мы адразу зразумелі, што разам зможам зрабіць нешта крутое.

Ідэя лэйбла прыйшла да нас у 2020 годзе пасля знаёмства з ІТ-бізнэсменам з Лондана, які вельмі цікавіўся музычным бізнэсам і прапанаваў нам сваю фінансавую і юрыдычную падтрымку, калі мы з Дзімам прыдумаем ідэю такога бізнэсу. Мы зразумелі, што наш досвед у музыцы, гуказапісе і прадзюсаванні, загорнуты ў дакладную бізнэс-схему, можа даць выдатныя вынікі. Так зʼявілася Goost Мusic».

Першым сурʼёзным артыстам лэйбла стаў якраз ОBLXKQ. Паступова ў яго сталі трапляць новыя імёны.

Развадоўскі займаецца творчымі працэсамі — музычнымі ідэямі, працай з аранжыроўкамі і ў студыі. Мікуліч больш працуе са звядзеннем і майстэрынгам трэкаў. У выніку ўдалай сумеснай працы зʼявілася цэлая хваля артыстаў з Беларусі, якія папулярныя ва ўсім свеце. Песні трапляюць у самыя папулярныя плэй-лісты. У тыктоку пад іх музыку запісваюць тысячы відэа.

Па словах Развадоўскага, «мова цяпер адышла на другі план, і па-сапраўднаму вялікую музыку можна пачуць ва ўсім свеце». Прыкладам зʼяўляецца рост папулярнасці беларускага выканаўцы Nikitata ў ЗША. Цяпер лэйбл рыхтуе некалькі калабарацый Мікіты з амерыканскімі артыстамі.

Як адзначае музычны журналіст Аляксандр Чарнуха, самае цікавае ва ўсёй гэтай гісторыі тое, што хлопцы схапілі музычную хвалю і навучыліся з ёй працаваць. Дзякуючы ім простыя беларускія падлеткі знаходзяць сваю аўдыторыю і выходзяць на глабальны рынак. Цяпер не абавязкова ехаць у Расію, каб вярнуцца адтуль знакамітасцю. Беларускі лэйбл прасоўвае беларускіх артыстаў і робіць гэта настолькі якасна, што яны становяцца зоркамі.

Чытайце яшчэ:

Топ беларускіх артыстаў, каго слухаюць у Spotify

Майстар з Гомеля, які зрабіў залатую гітару для Прынса

Самы папулярны беларускамоўны гурт у свеце — хто гэтыя хлопцы?

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера