Якім спортам займаецца прэм'ер-міністр Беларусі
Пра свае спартыўныя захапленні, якім прысвячае час у залежнасці ад агульнай загрузкі, кіраўнік урада расказаў у суботу на культурна-спартыўным фестывалі «Вытокi» ў Глыбокім, піша «Народная Воля».
Раман Галоўчанка. Фота: «Ваяр»
Раман Галоўчанка заявіў, што спартыўныя захапленні мае з дзяцінства.
«Прыйшоў са школы, закінуў ранец і, пакуль сонца не сядзе, знік на спартыўных пляцоўках», ― успомніў прэм'ер.
Цяпер, паводле Галоўчанкі, часу не хапае, але па меры магчымасці ён стараецца падтрымліваць форму ― хадзьба, веласіпед, тэніс.
Галоўчанка дадаў, што рэгулярна займацца спортам у яго не заўсёды ёсць магчымасць з-за загружанасці.
Лепшы від спорту, на яго думку, — гэта выхаванне дзяцей, асабліва маленькіх. «За імі заўсёды трэба вельмі шмат бегаць», ― растлумачыў Галоўчанка.
Дзеці беларускага прэм'ера (у Рамана Галоўчанкі дзве дачкі і старэйшы сын) таксама займаюцца спортам. У старэйшай дачкі ў спісе спартыўных заняткаў ― тэніс і спартыўныя танцы, а «малодшая падцягваецца, бярэ прыклад са старэйшай сястры». Пра спартыўныя захапленні сына-студэнта кіраўнік урада не ўдакладніў.
Чытайце таксама:
Галоўчанка: Кожны дзень перад намі ставяць новыя выклікі, якія патрабуюць нетрывіяльных рашэнняў
