У Бярэзінскім раёне зноў прадаюць сядзібу Патоцкіх, зніжка — 80%
На сайце Мінскага абласнога выканаўчага камітэта з'явілася абвестка аб продажы з аўкцыёну сядзібнага дома графаў Патоцкіх у Бярэзінскім раёне.
Фота: minoblim.by
Дом, які лічыцца помнікам архітэктуры, пабудаваны ў сярэдзіне XIX стагоддзя. Яго плошча перавышае 444 кв. метраў.
Таргі запланаваныя на 21 чэрвеня на электроннай гандлёвай пляцоўцы «БУТБ-маёмасць». Падаць заяўку можна да 15:00 пятніцы, 16 чэрвеня.
За гэты дом хочуць атрымаць 28,4 тысячы рублёў, што на 80% менш пачатковай цаны.
Акрамя ўласна будынка, з ім у арэнду на 50 гадоў здаецца зямельны ўчастак плошчай 0, 504 га. Тэрыторыю можна выкарыстоўваць у тым ліку для аказання турыстычных паслуг, але частка ўчастка размешчана ў водаахоўнай зоне Бярэзіны, што накладае пэўныя абмежаванні.
Будынак ужо спрабавалі прадаць восенню 2022 года, але пакупніка на нерухомую маёмасць не знайшлося.
Чытайце таксама:
Зноў спрабуюць прадаць графскую сядзібу ў Чачэрску
З чацвёртага разу прадалі старую панскую сядзібу ў Ганцавіцкім раёне
