«Я прашу вас, заставайцеся людзьмі». Святлана Ціханоўская выказалася аб прысудзе Раману Пратасевічу
Сёння ў Мінску быў вынесены прысуд па справе Nexta. Раману Пратасевічу прызначылі 8 гадоў калоніі ўзмоцненага рэжыму, аднак пад варту да разгляду апеляцыі не ўзялі. Сцяпану Пуцілу і Яну Рудзіку завочна далі 20 гадоў і 19 гадоў адпаведна.
Раману Пратасевічу прызначылі восем гадоў калоніі ўзмоцненага рэжыму. Фота: Віталь Піваварчык / БелТА
Святлана Ціханоўская пракаментавалапрысуд Раману Пратасевічу:
«Ці засталіся мы верныя сваім каштоўнасцям? Гэты прысуд — гэта яшчэ і праверка для ўсіх нас, бо каштоўнасці, на якіх будуецца дэмакратычны рух, такія:
— ніхто не павінен быць асуджаны па палітычных матывах;
— ніхто не павінен праходзіць праз катаванні;
— нічыё жыццё не павінна быць прадметам гандлю.
Таму сёння я прашу кожнага беларуса і кожную беларуску: паглядзіце на сябе, ці засталіся вы верныя сваім каштоўнасцям? Бо без іх мы рызыкуем стаць падобнымі да помслівага, бесчалавечнага рэжыму.
Я прашу вас, заставайцеся людзьмі.
Мы выступаем за дэмакратыю і за тое, што ўсе роўныя перад законам. Мы выступаем не за помсту, а за справядлівасць. Таму кожны, хто зараз здзяйсняе злачынствы супраць чалавечнасці ў Беларусі, павінен паўстаць перад судом. Але гэта мусіць быць незалежны і прафесійны суд.
А на гэты і любы іншы прысуд можна адказаць толькі адно: усе беларусы, якія пераследуюцца па палітычна матываваных справах, павінны выйсці на волю. З многімі з іх у нас няма сувязі некалькі месяцаў. Ад нас усё яшчэ хаваюць інфармацыю пра стан Віктара Бабарыкі, Сяргея Ціханоўскага, Ігара Лосіка і сотняў іншых палітвязняў. Да кожнага з іх павінны дапусціць адвакатаў і сваякоў.
Свабоду кожнаму і кожнай», — сказала Святлана Ціханоўская.
Чытайце таксама:
Раману Пратасевічу далі 8 гадоў калоніі. Але пакуль пакінулі пад хатнім арыштам
