Лукашэнка заявіў пра «ўкраінскага тэрарыста» і затрыманне «дваццаці саўдзельнікаў»
Па словах Лукашэнкі, «украінскага тэрарыста» затрымалі ў друкарні пад Бараўлянамі «з рознага роду анучамі бэчэбэшнымі і іншай літаратурай».
Месцы, дзе быў пашкоджаны расійскі самалёт-разведчык. Схема: «Байпол»
Па сцвярджэннях Аляксандра Лукашэнкі, «здарыўся цуд і дапамог бог». Разам з дыверсантам нібыта затрымалі і 20 яго саўдзельнікаў.
Мінулыя падобныя сцвярджэнні Аляксандра Лукашэнкі не раз аказваліся хлуснёй.
Па словах Лукашэнкі, затрыманы трапіў у Беларусь маршрутам Варшава — Лодзь — Рыга — Пскоў — Мінск.
«Яшчэ да камандзіроўкі ў Кітай (вы, напэўна, пра гэта здагадаліся) былі аддадзеныя самыя жорсткія распараджэнні сілавікам, — расказаў Аляксандр Лукашэнка 7 сакавіка, выступаючы перад жанчынамі, якіх узнагароджваў з нагоды 8 Сакавіка. — Былі перакрытыя межы Беларусі. Але мы разумелі, што асноўная наша праблема — гэта беларуска-расійская мяжа. Там у нас няма вайсковых падраздзяленняў. Ды і мяжы няма паміж Расіяй і Беларуссю. І галоўнай нашай задачай было не дапусціць пранікнення яго ў Расію. Таму што ў велізарнай бяздоннай Расіі знайсці яго было б вельмі складана. Мы гэта разумелі, а таму былі паднятыя сотні, а можа быць і тысячы людзей — ваенных усіх падраздзяленняў, каб закрыць Беларусь. Былі здзейсненыя пэўныя дзеянні, разгорнуты антытэрарыстычны штаб пад кіраўніцтвам старшыні КДБ Беларусі Івана Церцеля», — расказаў Аляксандр Лукашэнка.
Аляксандр Лукашэнка заявіў, што пашкоджанні нязначныя.
«На шчасце, самалёт не зведаў нейкіх значных пашкоджанняў, акрамя, як яны кажуць, драпін і адной прабоіны ў корпусе, якая вайсковаму самалёту не перашкаджае выконваць яго абавязкі», — сказаў Аляксандр Лукашэнка, паводле яго прэс-службы.
Раней беларускія дзяржаўныя СМІ называлі інцыдэнт на аэрадроме з расійскім самалётам А-50 фэйкам, адмаўлялі, што з ім нешта здарылася.
Лукашэнка заявіў, што «нягледзячы на захаванне самалётам здольнасці выконваць задачы, ён папрасіў расіян даслаць іншы».
«Мы вам паказвалі гэты самалёт. Як мне паведамілі, ён нават прэзідэнта сустракаў, калі я вяртаўся з Пекіна.
Тым не менш, мы папрасілі расіян, каб яны ўзялі гэты самалёт на абслугоўванне і даслалі нам іншы. Так і адбылося», — сказаў ён.
Насамрэч, ніякі новы самалёт дальняй разведкі аналагічнага тыпу ў Беларусі назіральнікі пакуль не адзначалі.
На мінулым тыдні самалёт А-50 вылецеў на рамонт на Таганрогскі завод і не вярнуўся, хоць дзяржаўныя СМІ ў той дзень заяўлялі, што самалёт ажыццяўляе аблёт тэрыторыі Беларусі і выконвае баявыя задачы.
Як сцвярджаюць вайсковыя эксперты, самалёт А-50 выкарыстоўваўся для навядзення на цэлі ва Украіне расійскіх ракет і дронаў.
Па словах Лукашэнкі, пры падрыхтоўцы «тэракта» выкарыстоўваліся «самыя высокія тэхналогіі». «Гэта сапраўды было штосьці неверагоднае», — сказаў ён.
І панаракаў, што абралі малы беспілотнік:
«Таму што, калі б яны выкарыстоўвалі вялікі, то сістэмы нашага сачэння, вядома, яго б адсачылі. Ва Украіне былі задзейнічаныя гэтыя два беспілотнікі, навучаны гэты чалавек і іншыя, якія яму дапамагалі. Пра гэта мы раскажам вам потым».
Аляксандр Лукашэнка нярэдка абяцае расказаць «пасля», і што «будзе вельмі цікава», але найчасцей за гэтымі словамі няма ніякага працягу.
На відэа, якія публікаваў «Байпол», да А-50 падлятаў самы звычайны камерцыйны дрон кітайскай вытворчасці.
Сама дыверсія здарылася 26 лютага. «Байпол» узяў адказнасць за яе на сябе, заявіўшы, што беларусы з дапамогай двух дронаў пашкодзілі самалёт. Сцвярджалася, што выканаўцы паспяхова здолелі пакінуць тэрыторыю Беларусі. «Байпол» апублікаваў таксама два відэа, на якіх бачна, як дрон прылятаў на разведку і сядаў на А-50, але відэа самой атакі не было.
Крыніцы «Нашай Нівы» і праваабаронцы паведамлялі пра масавыя рандомныя затрыманні і ператрусы ў раёне Мачулішчаў, а таксама сярод страйкбалістаў, рэканструктараў і стралкоў.
Чытайце таксама:
Сястра «дыверсанта» з міліцэйскай арыенціроўкі: Ён быў дома ў гэтыя дні
Красамоўна. Што лукашэнкаўскія каналы напісалі пра выбухі ў Мачулішчах
