На межах з ЕС цалкам зніклі чэргі з грузавікоў. У чым прычына?
У другой палове снежня на межах Беларусі і ЕС збіраліся шматтысячныя чэргі з грузавікоў. З 2-4 студзеня чэргі з велікагрузаў зніклі, а вось з легкавікоў — не.
Па стане на 14 гадзін 12 студзеня, на межах Беларусі і ЕС цалкам адсутнічаюць чэргі з грузавікоў. Апошні раз у гэтым месяцы кіроўцам велікагрузаў даводзілася стаяць у чарзе на выезд 2-4 студзеня. Гэты пры тым, што ў пікавыя дні снежня выезду з Беларусі ў ЕС чакала больш за 5000 фур. Тады кіроўцы былі вымушаны тыднямі бавіць час на мяжы.
Скрыншоты: gpk.gov.by
Па некалькі сутак даводзілася стаяць нават тым, хто меў пропуск для пазачарговага праезду.
Спецыялісты па міжнародных грузаперавозках звязваюць такую сітуацыю выключна з сезоннасцю. У студзені многія кампаніі ідуць у адпачынак, таваразварот падае, а разам з ім падаюць фрахты. За першы тыдзень новага года яны знізіліся на 30-40% у параўнанні са снежнем.
Калі не адбудзецца глабальных змен, то ўжо з наступнага месяца трафік пачне павялічвацца, разам з ім будуць расці тарыфы на перавозку і чэргі на межах.
