Лукашэнка патрабуе хутчэй будаваць парты для беларускага калію ў Расіі. Але будоўля там нават не пачыналася
Пра планы пабудаваць беларускія парты на расійскай Балтыцы Аляксандр Лукашэнка заявіў яшчэ ў лютым мінулага года. На сённяшняй нарадзе па экспарце ён наракаў, што няма часу чакаць.
Фота: БелТА
«У нас няма часу чакаць, пакуль пабудуецца тая ці іншая інфраструктура ў нейкім порце. Гаворка сёння ідзе перш за ўсё пра паўночна-заходні рэгіён Расійскай Федэрацыі. Прэзідэнт Расіі асабіста паказаў мне ўсе парты Піцера і вакол яго (ён ведае гэта дасканала) і прапанаваў: выбірайце любы кірунак. Але я яму сказаў, нам ужо сёння трэба грузіць. Кажа: любы пункт і пачынайце грузіць.
Таму (я так вобразна часта кажу) пакуль будзем будаваць — мяшкамі будзем грузіць. Натуральна, 12 мільёнаў тон і больш мяшкамі не загрузіш, але тым не менш гэта сведчыць аб тым, што мы ўжо сёння павінны літаральна на кожным свабодным квадратным метры расійскіх партоў грузіць свае тавары», — прыводзіць словы Лукашэнкі БелТА.
Як пісала «Радыё Свабода», будаўніцтва партоў не пачалося дагэтуль.
