Заўтра будзе пастаўлена кропка ў расследаванні катастрофы Боінга MH17. Фігурантам запрасілі пажыццёвае
Праз восем гадоў пасля крушэння «Боінга» ў небе над Данбасам суд Нідэрландаў вынесе свой прысуд у гэты чацвер, 17 лістапада. За два з паловай гады, якія сышлі на разгляд гэтай справы, у зале суда дэталёва разбіралі дакументы, развенчвалі тэорыі змовы, даследавалі альтэрнатыўныя сцэнары, праслухоўвалі перахопленыя тэлефонныя размовы і давалі слова сведкам, піша Бі-бі-сі.
Фота: AP
Дзве траціны загінулых у катастрофе рэйса MH17, які рухаўся з Амстэрдама ў Куала-Лумпур 17 ліпеня 2014 года, былі галандцамі, і менавіта галандскі пракурор узначаліў міжнародную следчую групу, якая праводзіла расследаванне.
Расія працягвае называць гэту справу палітызаванай, прадузятай і аднабокай, хоць усе аргументы, прадстаўленыя Масквой, суд уважліва вывучыў.
У датычнасці да катастрофы самалёта абвінавачваюцца:
Ігар Гіркін (Стралкоў) — грамадзянін Расіі — міністр абароны самаабвешчанай ДНР, адстаўны афіцэр ФСБ.
Сяргей Дубінскі — грамадзянін Расіі — старшы афіцэр ГРУ арміі Расіі ў адстаўцы.
Алег Пулатаў — грамадзянін Расіі — падпалкоўнік запасу ВДВ арміі Расіі.
Леанід Харчанка — грамадзянін Украіны — камандзір разведнай часткі ГРУ ДНР.
Пракуратура Нідэрландаў запрасіла для кожнага з іх пажыццёвы тэрмін, але падкрэслівае, што ніхто з абвінавачаных асабіста не ўдзельнічаў у пуску ракеты па «Боінгу».
