Яшчэ адзін знакавы палёт Нэнсі Пэлосі, якога да яе не рабілі амерыканцы высокага рангу
Спікер Палаты прадстаўнікоў ЗША Нэнсі Пэлосі прыляцела ў Арменію. Да гэтага краіну не наведвалі амерыканскія чыноўнікі такога высокага рангу, піша «Медуза».
Нэнсі Пэлосі. Фота: АР
17-19 верасня Пэлосі сустрэнецца з прэмʼер-міністрам Арменіі Ніколам Пашынянам, спікерам парламента Аленам Сіманянам і іншымі чыноўнікамі.
Спікер Палаты прадстаўнікоў Кангрэса стала самай высокапастаўленай афіцыйнай асобай ЗША, якая наведала Арменію з моманту здабыцця краінай незалежнасці.
Картэж Пэлосі ў Ерэване
«Візіт дэлегацыі Кангрэса ў Арменію зʼяўляецца магутным сімвалам цвёрдай прыхільнасці ЗША мірнай, квітнеючай і дэмакратычнай Арменіі, а таксама стабільнаму і бяспечнаму Каўказу», — заявіла Пэлосі перад візітам.
Яна адзначыла, што ў 2019 годзе Кангрэс ЗША, а пазней і прэзідэнт Джо Байдэн прызналі генацыд армян, і дадала: «Маральны абавязак усіх — ніколі не забываць абавязацельства, якое набыло асаблівую актуальнасць, паколькі зверствы здзяйсняюцца па ўсім свеце, у тым ліку з боку Расіі супраць Украіны».
У пачатку жніўня дэлегацыя Кангрэса ЗША на чале з Нэнсі Пэлосі наведала Тайвань. Гэта стала прычынай для абвастрэння адносін з Кітаем, які лічыць дэ-факта незалежны востраў сваёй тэрыторыяй. Пекін палічыў візіт Пэлосі ўмяшаннем у свае ўнутраныя справы і пачаў маштабныя вучэнні паблізу Тайваня.
Паміж Арменіяй і Азербайджанам у апошні час абвастрыліся адносіны. Напяэдадні краіны дамовіліся пра спыненне агню.
