Якія тавары і брэнды беларусы часцей за ўсё шукалі летам на інтэрнэт-пляцоўках?
Пляцоўка аб'яваў «Куфар» прааналізавала 226 мільёнаў запытаў, якія пакінулі беларусы ўлетку.
Амаль палова са спісу найбольш папулярных запытаў тычыцца адзення, абутку і аксесуараў. Гэта сукенкі, сумкі, басаножкі, красоўкі, касцюмы, купальнікі, заплечнікі, гадзіннікі, курткі, штаны, туфлі і топы.
На другім месцы ў сферы інтарэсаў карыстальнікаў у гэты перыяд — мэбля і бытавая тэхніка: канапа, халадзільнік, стол, шафа, ложак, кухня, тэлевізар, камода.
Самымі папулярнымі брэндамі лета сталі iPhone, Zara, Nike і Adidas.
Таксама беларусы шукалі нерухомасць — у топ-30 пошукавых запытаў трапілі «кватэра» і «дом».
Найбольш папулярным аўтамабільным брэндам трох летніх месяцаў стаў Audi. Часцей за ўсё машыны і запчасткі гэтага нямецкага вытворцы шукалі карыстальнікі з Брэсцкай і Гомельскай абласцей. На другім месцы — Volkswagen (пры гэтым гэта найбольш запатрабаваны аўтабрэнд у Гродзенскай, Віцебскай і Магілёўскай вобласці).
Інтарэсы карыстальнікаў прыкметна мяняліся ад месяца да месяца. Так, самым «легкадумным» стаў чэрвень. У першы месяц лета беларусы цікавіліся таварамі, якія патрэбныя ў гарачае надвор'е і на адпачынку — роварамі, басаножкамі, купальнікамі і шортамі.
Але чым бліжэй да восені, тым больш «прыземленымі» станавіліся запыты. І ў верхняй частцы рэйтынгу з'явіліся нерухомасць (кватэра), мэбля (канапа, стол), буйнагабарытная бытавая тэхніка (халадзільнік), а таксама дарагія гаджаты (iPhone).
