Замежных вайсковых аташэ завезлі ў Маларыцкі раён
Для замежных аташэ па пытаннях абароны, акрэдытаваных пры Міністэрстве абароны, сёння арганізавана наведванне Маларыцкага раёна, каб паглядзець на выкананне задач па ўзмацненні ўчасткаў дзяржаўнай мяжы.
Пра гэта паведамляе прэс-служба Мінабароны.
— Мерапрыемства праводзіцца з мэтай практычнага азнаямлення замежных вайсковых дыпламатаў з задачамі і дзеяннямі падраздзяленняў Узброеных сіл у паўднёвых раёнах краіны, — растлумачылі ў вайсковым ведамстве.
Паведамляецца, што ахова паўднёвай мяжы Беларусі ідзе ва ўзмоцненым рэжыме. Адпрацоўваецца комплекс мерапрыемстваў, накіраваных на супрацьдзеянне магчымым пагрозам. Батальённа-тактычныя групы выконваюць задачы ў прызначаных раёнах. Падраздзяленні працуюць на ратацыйнай аснове. Пад ахову ўзятыя важныя аб'екты, у тым ліку дарогі і пуцеправоды, распавялі ў Мінабароны.