Прэзідэнт Літвы: У нас ёсць агульны абавязак — быць на правільным баку гісторыі
Прэзідэнт Літвы Гітанас Наўседа заявіў, што пасля таго, як Расія пачала вайну супраць Украіны, НАТА павінна выразна заявіць, што Расія ўяўляе сабой сур'ёзную пагрозу еўраатлантычнай бяспецы, а на мадрыдскім саміце — прыняць рашэнні па бяспецы ў Балтыйскім рэгіёне, піша delfi.lt. Акрамя таго, ён падкрэсліў, што Беларусь фактычна стала часткай Расіі.
Гітанас Наўседа
«Пуцін пачаў з Украіны. Але ясна, што ў яго ёсць больш маштабныя планы, такія як разбурэнне ўсёй архітэктуры еўраатлантычнай бяспекі», — заявіў Наўседа падчас пасяджэння Парламенцкай асамблеі НАТА ў Вільні ў панядзелак.
Прэзідэнт Літвы падкрэсліў, што НАТА таксама атрымлівала патрабаванні і ўльтыматумы Расіі «з выразнымі намёкамі на Балтыйскі рэгіён».
Наўседа таксама звярнуў увагу на тое, што ў сувязі з тым, што дэ-факта Беларусь стала часткай Расіі, умовы бяспекі ў Балтыйскім рэгіёне рэзка змяніліся, а час для рэагавання НАТА зводзіцца да нуля.
«Таму мы павінны зрабіць усё, каб Пуцін ніколі не адважыўся праверыць нашы межы і рашучасць НАТА», — сказаў літоўскі лідар.
Наўседа сказаў, што вайна ў Еўропе патрабуе неадкладных зменаў у палітыцы стрымлівання і бяспекі НАТА. Неабходна ўмацаваць Сілы перадавога базавання НАТА ў Літве, павялічыўшы кантынгент з узроўню батальёна да брыгады.
«Мы таксама павінны зразумець, што Расія — гэта пагроза, якая доўга не знікне. Таму мы павінны выразна агучыць, што Расія ўяўляе сабой вялікую і доўгатэрміновую пагрозу для ўсяго еўраатлантычнага рэгіёна», — сказаў літоўскі кіраўнік.
Ён таксама заявіў, што Расія свядома пайшла на разбурэнне сусветнага парадку і што пасля 24 лютага не можа быць ніякіх ілюзій. Неабходна ўсвядоміць, што «сумневы, пасіўнасць і міралюбнасць будуць толькі спрыяць далейшай агрэсіі».
Прэзідэнт Літвы таксама сказаў, што ён быў шакаваны заклікамі да Украіны перадаць свае тэрыторыі Расіі, каб пакласці канец вайне.
«Мы жывём у вельмі цяжкія і цёмныя часы, але мы ёсць адзін у аднаго, а таксама нашы агульныя каштоўнасці. Гэта фундамент, які мы ніколі не павінны падвяргаць сумневу або прадаваць. У нас таксама ёсць агульны абавязак — быць на правільным баку гісторыі», — падкрэсліў літоўскі лідар.
