У дзяцей у 12 краінах зафіксавалі гепатыт невядомага паходжання. Адно дзіця памерла
Захворванне пряўляецца як востры гепатыт (запаленне печані) з прыкметна павышаным узроўнем пячоначных ферментаў.
На сёння ў свеце зафіксавалі 169 выпадкаў заражэння дзяцей вірусам гепатыту невядомага паходжання — у 12 краінах свету. Адно дзіця загінула.
Аб распаўсюджванні хваробы паведамілі ў Сусветнай арганізацыі аховы здароўя.
Паводле даных СААЗ, выпадкі захворвання ўжо зарэгістравалі ў Вялікабрытаніі (114), Іспаніі (13), Ізраілі (12), ЗША (9), Даніі (6), Ірландыі (5), Нідэрландах (4), Італіі (4), Нарвегіі (2), Францыі (2), Румыніі (1) і Бельгіі (1).
Захворванне праяўляецца як востры гепатыт (запаленне печані) з прыкметна павышаным узроўнем пячоначных ферментаў. У многіх выпадках выяўляліся страўнікава-кішэчныя сімптомы, у прыватнасці, боль у жываце, а таксама дыярэя, ваніты, якія папярэднічаюць развіццю цяжкага вострага гепатыту.
Аднак у ніводным з гэтых выпадкаў вірусы гепатыту тыпу A, B, C, E і D не былі выяўленыя, паведамілі ў СААЗ. Захворванне новым відам гепатыту фіксуюць у дзяцей ад аднаго месяца да 16 гадоў. 10% хворых патрабавалася трансплантацыя печані.
Таксама ў большасці заражаных не фіксавалі павышанай тэмпературы цела і ліхаманкі, пры гэтым у 74 выпадках былі выяўленыя адэнавірусы, якія выклікаюць вострыя рэспіраторныя захворванні ў людзей.
Цяпер у краінах, дзе была выяўленая найбольшая колькасць выпадкаў захворвання, працягваюцца даследаванні, якія будуць уключаць падрабязную гісторыю клінічнай хваробы і ўздзеяння, таксікалагічныя тэсты і дадатковыя мікрабіялагічныя тэсты.
