Рабочы з Гомеля сабраў у сябе дома цэлы баявы арсенал
41-гадовы гамяльчук займаўся аматарскімі раскопкамі і знаходзіў пры гэтым боепрыпасы часоў вайны. З часам сабралася дастаткова багатая калекцыя, пра якую даведалася міліцыя. У выніку да мужчыны прыйшоў ГУБАЗіК.
Мужчына захоўваў у гаражы дома і на дачы зброю і боепрыпасы, якія знайшоў падчас раскопак у месцах баявых дзеянняў часоў вайны. Раскопкі, удакладнілі ў міліцыі, былі незаконныя.
Усяго ў гомельскага «чорнага археолага» канфіскавалі 18 артылерыйскіх узрывальнікаў, тры ружэйныя гранаты, аскепкава-фугасныя і бранябойна-трасуючыя артылерыйскія снарады, а таксама самаробны пісталет. Эксперты ўжо вызначылі, што ўсё гэта прыдатна для выбухаў і стрэлаў.
Гамяльчук запэўнівае, што не збіраўся выкарыстоўваць баявы арсенал у злачынных мэтах. Але ў дачыненні да яго ўсё адно распачатая крымінальная справа за незаконныя дзеянні ў дачыненні да агнястрэльнай зброі, боепрыпасаў і выбуховых рэчываў.
